Përmes një postimi në Instagram, dirigjienti i Elsa Lilës, Enricco Melozzi, ka ngritur jo pak akuza rreth këngës që do të përfaqësojë Shqipërinë në Eurovision, "Duje" nga Albina Kelmendi dhe familja e saj.

"A është e mundur që një artist të propozojë dhe të regjistrohet si solist, me një emër që botohet në të gjitha gazetat e botës dhe pastaj të paraqitet si grup, qoftë edhe me një emër tjetër? A ka mundësi që ky grup të mos paraqitet në prova dhe të zbulohet vetëm në para-gjeneral, madje duke shkaktuar probleme teknike pasi askush nuk dinte për praninë e një grupi vokal dhe nuk ishin siguruar mikrofonat e nevojshëm?" - këto janë pyetjet e para që dirigjenti drejton, duke lënë të kuptohet se Albina është regjistruar vetëm në Festival, por më pas ka sjellë edhe familjen. 

Melozzi ngre akuza edhe mbi manipulimin e votave.

Ndër të tjera, ai rikujton se "vite më parë këngëtarë janë skualifikuar vetëm se kanë kënduar për herë të dytë refrenin" - duke lënë të kuptohet se ndoshta kështu duhej të ndodhte edhe me Albina Kelmendin, e cila, në një moment ndaloi për të kënduar dhe njëherë këngën bashkë me publikun.

7 vitë më parë, Klajdi Musabelliu u përjashtua nga Festivali i Këngës sepse u rikthye në skenë dhe këndoi refrenin me publikun, për herë të dytë.

Në një postim në TikTok, ai ka thënë se "uron që kjo të mos i ndodhë edhe Albinës".

Dirigjenti thotë se "arroganca dhe injoranca mbizotëroi mbi kulturën dhe bukurinë" dhe e quan fitoren [e Elsa Lilës] si të "hidhur".

Elsa Lila me këngën dedikuar të bijës, "Evita", fitoi çmimin e jurisë në Festivalin e Këngës, por përfaqësuesin në Eurovizion këtë vit e vendoste publiku.