Emisionet shqiptare janë të larmishme dhe trajtojnë tematika të ndryshme, por bashkohen në një pikë: Kanë çaste, gafa dhe incidente super gazmore.
E nisim me më të freskëtën: Këllëfi i dhëmbit të parmë të Bes Kallakut fluturoi krejt papritur, duke shkaktuar të qeshura dhe humor në studio, patjetër, edhe meme në internet.
Sërish Besi, që rrëzohet dhe thjesht përqafohet nga dyshemeja. Një minutë dhimbje dhe shok për Besin, goxha minuta të qeshura në studio.
Por, këto situata përkojnë edhe me ngatërresa që për shumë kohë i kanë dhuruar të qeshura dhe ndonjëherë edhe mimika të çuditura publikut.
Për shembull:
Adriatike Lami është bërë hit në internet falë përgjigjes që i dha gazetares që e ngatërroi me Rudina Çupin. Adriatikja menjëherë i dha një super përgjigje: “Quhem Adriatike Lami dhe emrin e kam më të shenjtë se emisionin tuaj të mëngjesit!”. Më pas, shtoi “Duket që keni lexuar shumë, por gjithsesi ja ku jemi, le të njihemi”.
E kush mund ta harrojë Mimoza Ahmetin me: “Ç’janë k’to emisione, pashë Zotin”. Poetja ishte ftuar në emisionin “Pasditja ime”, i moderuar nga Gerta Gixhari. Kjo e fundit i ndërpreu fjalën Mimozës, e cila u irritua dhe e qortoi se nuk i ndërpritet fjala personazhit të ftuar.
Po Preç Zogaj që flet në telefon me mjeken, ndërkohë që ishte live në emision (sërish me Gerta Gixharin)? Analisti jo vetëm që i përgjigjet telefonatës, por edhe shtrohet në muhabet me mjeken për analizat e gjithçka, ndërkohë që moderatorja priste të zhvillonte intervistën.
Gafat e Rudina Magjistarit janë ato më të lezetshmet, sidomos ajo kur interviston Mariza Ikonomin dhe me siguri të plotë i thotë se “të gjithë e mbajnë mend" kur dilte në skenë me xhaxhain, Françesk Radin. Sigurisht, Mariza e korrigjoi, duke i rikujtuar që Françesk Radi (tanimë i ndjerë) ka lidhje familjare me Rozana Radin, sepse xhaxha…i njëjti mbiemër…
Edi Manushi është një moderator i këndshëm, por ka një problem: Nuk e thotë dot: “Qante Qaniu pas qerres së qumështit se qeni qimekuq i qe qepur pas”. Ai ka versionin e tij dhe e dëgjoni këtu.
Nuk e dimë sa mbani mend nga këto, apo doni të shtoni të tjera në listë, ama jemi të bindur që ju dhuruam buzëqeshje.
Kaq kishim. Puç dhe mos harroni të mbroni këllëfët e dhëmbëve dhe të shihni ku i hidhni hapat.
