Bota e sportit dhe jo vetëm është tronditur nga vdekja e gazetarit amerikan të futbollit, Grant Wahl, i cili ndërroi jetë teksa mbulonte ndeshjen mes Argjentinës dhe Holandës mbrëmjen e së premtes.
Wahl, i cili ishte korrespondent për CBS Sports ishte 49 vjeç. I ndjeri ndodhej i ulur në stadium kur u rrëzua gjatë minutave shtesë të ndeshjes. Gazetarët e tjerë rreth tij, bënë gjithçka mundën dhe thirrën menjëherë ndihmën mjekësore, por fatkeqësisht nuk ia dolën ta mbanin në jetë.
Gruaja e Wahl, Dr Celine Gounder, një epidemiologe e sëmundjeve infektive që shërbeu në grupin e punës që u mor me trajtimin e Joe Biden kur u infektua me Covid-19, konfirmoi vdekjen e të shoqit teksa shkruante.
“Jam shumë mirënjohëse për mbështetjen ndaj bashkëshortit tim Grant Wahl dhe shumë miqve që kanë kontaktuar sonte. Jam totalisht në shok."
Zëdhënësi i Departamentit Amerikan të Shtetit, Ned Price, tha në një postim në Twitter se Shtetet e Bashkuara janë "të angazhuara me zyrtarë të lartë të Katarit për të siguruar që dëshirat e familjes së tij të përmbushen sa më shpejt që të jetë e mundur".
Ndonëse ende shkaku i vdekjes ende nuk është konfirmuar, bëhet me dije se gazetari i njohur nuk ishte ndjerë mirë fizikisht që prej pak ditësh. Madje, në fillim të javës ishte vetë ai që raportoi se ishte vizituar në një klinikë mjekësore sepse nuk ndihej mirë.
"Ndjej se trupi m'u lëshua i gjithi. Tre javë thuajse pa gjumë, shumë stres dhe shumë punë. Ajo që kishte qenë një ftohje gjatë 10 ditëve të fundit u shndërrua në diçka më të rëndë në natën e ndeshjes SHBA-Holandë dhe mund të ndjeja një shqetësim në pjesën e sipërme të gjoksit. Nuk kisha Covid (këtu bëj teste rregullisht), por shkova sot në klinikën mjekësore në qendrën kryesore dhe më thanë se ndoshta kam bronkit. Ata më dhanë një kurë me antibiotikë dhe një shurup të rëndë për kollën dhe tani ndihem më mirë, por ende jo dhe aq mirë."- shkroi vetë Wahl pak ditë para se të ndërronte jetë tragjikisht në stadium.
Burimi: The Guardian
