Në mbrëmjen e sotme të “Dancing with the stars” u vendos edhe emri i parë që kalon në gjysmëfinalen e spektaklit: Megi Pojani. 

Pas votimit të jurisë dhe mbledhjes së votave të publikut, Megi rezultoi më e votuara e natës së sotme. Javën e ardhshme ajo do të ketë imunitet, që do të thotë se nuk mund të shkojë në dance-off.

E ftuara speciale e spektaklit ishte këngëtarja Elvana Gjata, e cila ka fituar "Dancing with the stars" në vitin 2012. Konkurrentët kërcyen të gjithë me këngët e Elvanës. Veç anëtarëve të jurisë, edhe ajo pati mundësinë të votonte konkurrentët me pikë.

Elvana performoi dy herë, në nisje dhe në fund të mbrëmjes duke dhuruar emocione të forta. Në fillim, performoi e shoqëruar nga disa balerinë hite si “Me tana”, “Puthe” dhe “Clap Clap”.

E shoqëruar në fund nga balerini dhe koreografi Esdalin Gorani, Elvana dhuroi një super spektakël me “Loti”, për shkak të aftësive në kërcim si edhe detajeve skenike.

Në këtë puntatë nuk pati eleminime. Kujtojmë se në javët e kaluara janë eleminuar: Ilir Dushkaj, Alban Nimani, Irini Qirjako, Elona Duro, Gent Hazizi, Deborah Keçi dhe Arbër Çepani.