Më shumë se 300,000 njerëz votuan për Fjalën e Vitit të Oksfordit për vitin 2022. Në vend të parë u rendit: Goblin Mode.

Modaliteti Golbin? Çfarë nënkupton? Goblin Mode është një term zhargon që i referohet një qasjeje për të refuzuar pritshmëritë shoqërore dhe për ta jetuar jetën në mënyrë të çrregullt, pa marrë parasysh imazhin e vetes.

I keni parasysh manifestimet për të qenë versioni më i mirë i vetes? Goblin Mode është e kundërta. Në folklorin e popujve të ndryshëm, “goblin” i referohet krijesave të vogla, groteske dhe të këqija. Në rrjete sociale, tashmë i referohet njerëzve që e jetojnë jetën duke hequr dorë nga normat e shoqërisë dhe përqafojnë instiktet e tyre për një përvojë çliruese.

“Termi u jep njerëzve lirinë për të hequr qafe normat shoqërore dhe për të përqafuar ato të rejat,” tha gjuhëtari dhe leksikografi amerikan, Ben Zimmer. “Duke pasur parasysh vitin që sapo kemi përjetuar, Goblin Mode tregon se të gjithë ne ndihemi pak të mbingarkuar.”

Në vendin e dytë u rendit fjala “metaverse” – një mjedis i realitetit virtual – ndërsa në vendin e tretë hashtagu '#IStandWith' – një hashtag i përdorur për të shprehur solidaritetin me një kauzë, grup, person etj.