Kristalet kanë qenë një nga temat më me interes për ju lexuesit e Anabel gjatë këtij viti. Ashtu si shumë personazhe të famshëm – si Victoria Beckam, Kim Kardashian, motrat Hadid, Miranda Kerr, Adele etj. – të shumtë janë njerëzit që e kanë të pamundur të mohojnë fuqinë që kristalet kanë në jetën e tyre. Disa nga pyetjet më të shpeshta në Instagramin tonë kanë qenë: Ku t’i gjej në Shqipëri? Si përdoren? Çfarë kristalesh të marr?

Për këto dhe shumë pyetje të tjera, ne kontaktuam me Fjorza Mullajin, themeluese e Just Fjo Accessories, i njohur si “dyqani më me energji pozitive në qytet”. 

Fjorza Mullaji
Themeluese e Just Fjo Accessories

Just Fjo Accessories e gjeni në rrugën “Myslym Shyri”, ndërsa dyqanin e ri Just Fjo në rrugën “Bridaga VIII” (ish-Bllok).

Si ndihmojnë kristalet për pjesën e shërimit?

“Qëllimi kryesor i përdorimit të tyre që në lashtësi ka qenë shërimi, jo gjithmonë në aspektin shëndetësor, po edhe atë energjik. Kristalet kanë energji. Edhe ne si njerëz përbëhemi nga energjia, prandaj mund të shkëmbejmë energji me kristalin kur punojmë me të.”

Si kuptohet që kristali funksionon?

“Në disa raste, dallohet menjëherë efekti. Ndonjëherë duhet pak kohë për t’u perceptuar dhe kjo varet nga funksioni i kristalit.”

Si përdoren?

“Nëse janë bizhuteri është e lehtë pasi mjafton mbajtja e tyre. Në formë kristali duhet t’i marrim me vete ose t’i vendosim në ambientin ku qëndrojmë (për shembull zyrë, dhomë) Përdorimi është më i drejtpërdrejtë gjatë meditimit.”

A duhet të fillojmë me kristale që na nevojiten apo ka kristale për fillestarët?

“Po, ka kristale për fillestarët si për shembull: Amethyst, Rose quartz, Obsidian, Jasper, Agate etj. Megjithatë unë këmbëngul t’i merrni sipas nevojave momentale.”

Çfarë kristalesh mund të përdoren për ankthin?

“Amethyst lidhet me balancën emocionale dhe qartësinë mendore. Tiger eye lidhet me stresin mendor dhe largimin e frikërave. Lepidolite ose smokey quartz janë disa sugjerime më të përgjithshme.”

Po për karrierë ose financat?

“Do të sugjeroja Citrinë, Tiger eye dhe Pyrite. Janë fantastike dhe qëndrojnë shumë mirë së bashku.”

Nuk duam ta harrojmë dashurinë...

“Më i njohuri është rose quartz. Por, ne kemi krijuar prej 6 vitesh një kombinim tonin sekret që është ideal për ju që “nuk ju ecën”.”

A mendon që mund të jenë kristalet një ide e këndshme për dhuratë?

“Patjetër. Unë besoj që kristali është një dhuratë shumë kuptimplotë, sepse dhuron një produkt me gur natyral, jep një copëz natyre, një pjesë që përmban një energji të pashtershme kozmike.”