Cristiano Ronaldo mendoi se shënoi golin që do ta vendoste atë krahas rekordit të portugezit Eusebio si futbollisti që ka shënuar më shumë gola për Portugalinë në Kupën e Botës. Të gjithë menduan se ishte Ronaldo ai që shënoi golin kundër Uruguait, por nuk rezultoi kështu.

Shokët e skuadrës iu afruan për ta lavdëruar për golin pas pasimit të Bruno Fernandes. Goli iu dha Ronaldo-s, por në një njoftim të mëvonshëm, u sqarua se shënuesi ishte Fernandes.

Pas ndeshjes, Fernandes pranoi që edhe ai mendonte se Ronaldo e kishte prekur topin. “Mendoja që Ronaldo e preku topin. Unë po ia kaloja topin atij,” u tha ai gazetarëve. “Çfarë ka rëndësi është fakti që kaluam në raundin tjetër pasi mundëm një kundërshtar të vështirë.”

“Para ndeshjes, fëmijët e mi më thanë se do të shënoja dy gola,” i tha FIFA-s Fernandes – i cili shënoi të dytin me një penallti më vonë.

Në rrjete sociale, disa njerëz kanë bërë shaka me faktin që Ronaldo mendoi që shënoi gol, ndërsa të tjerë theksojnë se në ato momente shpejtësie, të gjithë do të kishin menduar se e prekën topin. Gjithashtu shumë vënë në dukje se prania e Ronaldo-s afër portës hutoi portierin, çka do të thotë se dha një kontribut të madh te goli.