Presidentja e Kosovës, Vjosa Osmani, është vendosur në qendër të kritikave nga opinioni publik sepse zgjodhi një spital privat për t’iu nënshtruar një ndërhyrjeje kirurgjikale.
Përmes një njoftimi zyrtar, zyra e presidencës njoftoi: “Pas rekomandimit nga mjekët specialistë, Presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses.”
Pas njoftimit, Klinika e Kirurgjisë Abdominale në Qendrën Klinike Universitare të Kosovës shprehu indinjatën për anashkalimin e institucionit publik.
“Duke u bazuar në situatën aktuale, Kolegjiumi i Kirurgëve të Kosovës reagon ndaj anashkalimit që Presidentja e Republikës së Kosovës znj. Vjosa Osmani i ka bërë këtij institucioni duke mos kërkuar trajtim shëndetësor në institucionin tonë, por pa u konsultuar fare me personelin udhëheqës, ka marr trajtim shëndetësor jashtë SHSKUK-së,” shkruan deklarata e nënshkruar nga mjekët.
“Operacioni për heqjen e tëmthit është një procedurë rutinë që kryhet në Klinikën e Kirurgjisë Abdominale që nga viti 1999, me përqindje të suksesit 99.9%. Injorimi dhe nënçmimi që presidentja i ka bërë kolegjiumit të kirurgëve e në veçanti institucionit që udhëheq është e papranueshme për të gjithë,” shkruhet në vijim.
Mjekët i urojnë presidentes shërim të shpejtë dhe kërkojnë që të mos anashkalohen institucionet shëndetësore publike.
Nëpër komente, shumë njerëz shkruajnë se Vjosa Osmani “si qytetare e Republikës së Kosovës ka të drejtë të zgjedhë nëse dëshiron të trajtohet në spitalet private apo publike”, por “si presidente e ka detyrim moral që të zgjedhë QKUK-në për trajtim para secilit institucion tjetër.”
“Nëse një nga njerëzit kryesor të vendit nuk i beson sistemit publik shëndetësor, atëherë si do t’i besojnë qytetarët?” shkruan dikush.
