Nëna e vajzës së George Floyd, Roxie Washington, ka paditur reperin Kanye West për 250 milionë dollarë, pasi ai pretendoi se 46-vjeçari vdiq nga abuzimi me drogën në vend të faktit që u vra nga një oficer policie.
Të shtunën e kaluar, në podcastin “Drink Champs”, West pretendoi se Floyd vdiq nga një mbidozë me fentanyl. Megjithatë, ekspertët kanë vërtetuar se shkaku i menjëhershëm i vdekjes së Floyd ishte pushimi i zemrës nga pamundësia për të marrë lirisht frymë.
Avokatët që përfaqësojnë Roxie Washington shprehen: “Shkaku i vdekjes së zotit Floyd është sqaruar mirë përmes provave të paraqitura në gjykata gjatë gjykimeve penale dhe civile. Megjithatë, ju keni bërë me qëllim të keq deklarata që janë të pasakta dhe të pabaza, duke shkaktuar dëme në pasurinë e zotit Floyd dhe familjen e tij.”
Në maj 2020, vdekja e Floyd shkaktoi protesta ndërkombëtare dhe nxiti një bisedë globale rreth brutalitetit të policisë në SHBA pasi oficeri i policisë së Minneapolis, Derek Chauvin, vendosi gjurin në qafën e George Floyd të paarmatosur për gjithsej nëntë minuta e 29 sekonda gjatë një arrestimi.
Në prill 2021, Chauvin u shpall fajtor për tre akuza për vrasje dhe tani po vuan dy dënime me burg prej më shumë se 22 vjetësh. Tre oficerë të tjerë të përfshirë në incident morën dënime më të lehta.
