Nuk ka Grammy të tjera! Drake dhe The Weeknd kanë zgjedhur të mos marrin pjesë në çmimet Grammy 2023, duke shënuar vitin e dytë radhazi që të dy artistët kanadezë kanë refuzuar të marrin pjesë, sipas Vibe.

Të dy muzikantët kanë shprehur zhgënjimin e tyre për prapaskenat e Grammy.

Kur u njoftuan nominimet për Grammy 2021, mijëra njerëz mbetën të habitur kur panë se The Weeknd - një nga artistët më të suksesshëm dhe të vlerësuar të atij viti, kënga e të cilit “Blinding Lights” u bë e para këngë që qëndronte në Top10 e Billboard Hot100 për një vit të plotë - nuk ishte nominuar për asnjë çmim.

"Për shkak të komiteteve të fshehta," tha Weeknd, "Unë nuk do të lejoj më që labeli im të paraqesë muzikën time në Grammy".

Komitetet e fshehta janë anëtarë të bordit që pretendohet se kanë marrëdhënie me artistë të ndryshëm. Sipas akuzave, mendohet se bordi manipulon procesin për të siguruar që këngë ose albume të caktuara të nominohen.

“Grammy-t mbeten të korruptuar. Më detyroheni transparencë mua, fansave të mi dhe industrisë!” u shpreh në Twitter The Weeknd pasi u bë publike lista me këngëtarët e nominuar.

Pas tij, reagoi edhe Drake, i cili jo vetëm që mbështeti publikisht The Weeknd, por në të njëjtën kohë edhe iu kundërvu akademisë.

“Mendoj se duhet të ndalojmë së habituri çdo vit për këtë shkëputje të muzikës me ndikim dhe këtyre çmimeve dhe të pranojmë që ajo çfarë ishte më parë forma më e lartë e njohjes, të mos ketë rëndësi për artistët që ekzistojnë tani dhe ata që do të vijnë më pas. Është pak a shumë si një i afërm për të cilin ti pret që të ndryshojë, por ai nuk rregullohet.”

Nicki Minaj ishte një nga artistet që ripostoi deklaratën e Drake. Kujtojmë se më parë ajo ka ironizuar akademinë.

“Nuk e harroj kurrë që Grammy nuk më dha çmimin e Artistit të Ri më të Mirë kur kisha 7 këngë në të njëjtën kohë të renditura në Billboard, më shumë se çdo repere tjetër femër në dekadën e fundit. Ata ia dhanë një njeriu të bardhë, Bon Iver," shkroi ajo në Twitter.

Shënim: Bon Iver nuk është njeri, por një grup amerikan indie-folk i themeluar në vitin 2006 nga kantautori Justin Vernon. Në Grammy 2012, grupi fitoi "Artisti i ri më i mirë" dhe "Albumin më i mirë alternativë" për albumin "Bon Iver, Bon Iver".