Le të themi se duket si një aeroplan-automjet dhe një version më i madh i një droni të zakonshëm.
Një firmë kineze e prodhimit të automjeteve elektrike, Xpeng, testoi një model makine fluturuese elektrike në Dubai, Emiratet e Bashkuara Arabe. Prova ofroi një paraqitje të shkurtër të teknologjisë revolucionare që mund t'i transportojë njerëzit nëpër qytete ku ka shumë trafik.
Sipas CNBC, makina me emrin X2 është një nga dhjetëra projektet e makinave fluturuese në mbarë botën. Ajo mund të transportojë dy pasagjerë, fuqizohet nga një grup prej tetë helikash dhe mund të arrijë shpejtësi deri në 130 km/h.
Makina është plotësisht elektrike dhe emeton zero karbon. Ajo mund të mbajë deri në 500 kg.
“Makina fluturuese është një artikull luksi dhe shumë individë me pasuri të lartë janë në kërkim të teknologjisë dhe produkteve të tilla luksoze. Dubai është vendi ku ne kemi klientë," tha drejtori ekzekutiv për zyrat ndërkombëtare në Dhomën e Tregtisë dhe Industrisë në Dubai, Omar Abdulaziz Alkhan.
Testi i makinës fluturuese elektrike është konsideruar si një vështrim drejt së ardhmes, ku njerëzit mund të fluturojnë mbi qytet drejt destinacionit të tyre duke shmangur trafikun.
