29 të vrarë gjatë arrestimit të djalit të El Chapo
Të paktën 29 persona u vranë gjatë operacionit të përgjakshëm për arrestimin e djalit të mbretit meksikan të drogës "El Chapo", thonë autoritetet meksikane. Ovidio Guzmán-López, 32 vjeç, një udhëheqës i ish-kartelit të babait të tij, u kap në Culiacán dhe u dërgua në Mexico City të enjten.
Por gjatë dhe pas arrestimit u vranë 10 ushtarë dhe 19 të dyshuar. Anëtarët e tërbuar të bandës u vunë flakën dhjetëra automjeteve dhe sulmuan aeroplanët në një aeroport lokal. Z. Guzmán-López - i njohur si "Miu" - u nxorr me helikopter dhe u dërgua në kryeqytet përpara se të dërgohej në një burg federal të sigurisë maksimale.
Ai akuzohet se ka udhëhequr një pjesë të kartelit famëkeq Sinaloa të babait të tij - një nga organizatat më të mëdha të trafikut të drogës në botë. Babai i tij, Joaquín "El Chapo" Guzmán, po vuan dënimin e përjetshëm në SHBA pasi u shpall fajtor në vitin 2019 për trafik droge dhe pastrim parash. Gjyqi i tij zbuloi disa nga detajet brutale se si funksionojnë kartelet e drogës në Meksikë.
"Çlironi leopardët!" Fushata synon të “turpërojë” Gjermaninë që të dërgojë tanke në Ukrainë
Një fushatë e nisur nga dy politikanë finlandezë synon të “turpërojë” Gjermaninë që të sigurojë tanke Leopard në Ukrainë.
Deri më tani, asnjë vend perëndimor nuk ka dhënë tanke kryesore luftarake për të ndihmuar ushtrinë ukrainase - megjithëse Franca njoftoi këtë javë se të ashtuquajturat tanke të lehta, automjetet luftarake të blinduara AMX-10 RC, do të dërgohen për herë të parë.
Anders Adlercreutz nga Partia Popullore Suedeze dhe Atte Harjanne nga të Gjelbërit argumentojnë se nëse vendet më të vogla me tanke Leopard japin nga pak secili, atëherë përdoruesi më i madh europian i Leopardëve, Gjermania, nuk do të ketë asnjë justifikim për të mos siguruar tanket – gjë që e kanë kërkuar vetë ukrainasit.
Inflacioni në eurozonë bie sërish
Inflacioni vjetor në të gjithë eurozonën shkoi në 9.2% në fund të dhjetorit, sipas një vlerësimi të shpejtë të publikuar nga Eurostat të premten në mëngjes. Inflacioni filloi të lehtësohej në nëntor, por gjithsesi qëndroi në nivelin 10.1%.
Edhe pse lajmi mund të shihet si një zhvillim pozitiv, norma e inflacionit të eurozonës përfaqëson pothuajse pesëfishin e objektivit prej 2% të vendosur nga Banka Qendrore Europiane (BQE). Muajt e fundit, baka ka rritur normat e interesit me një ritëm agresiv.
Virginia: 6-vjeçari qëllon me dashje mësuesen në shkollë
Një fëmijë 6-vjeçar qëlloi qëllimisht një mësuese në një shkollë fillore në Virginia të premten pasdite, sipas policisë.
Nxënësi është vendosur në paraburgim dhe mësuesja, një grua rreth të 30-ave, u dërgua në një spital lokal për t'u trajtuar për lëndime që "besohej se ishin kërcënuese për jetën", sipas departamentit të policisë. Gjendja e saj u përmirësua disi deri vonë pasdite.
Policia nuk ka dhënë detaje se si fëmija mendohet se ka marrë armën.
