Diskutim është një fjalë që nuk i përshtatet komunikimit aspak miqësor mes kryetarit të jurisë së “Dance Albania”, Ilir Shaqiri, dhe konkurrentit (të eleminuar tashmë), Igli Zarka, por ne do të biem dakord që ta konsiderojmë të tillë.

Ju kujtohet koha e “Big Brother VIP”? Me siguri i mbani mend debatet pasivo-agresive të Ilirit, që ndiznin sherret nëpër shtëpi (Po, Donald; me ty e kemi!). Një skenë në “Dance Albania” na riktheu nostalgjinë e reality show-t ku shumica e diskutimeve shndërrohej në ironi, komente disi agresive dhe ofendime.

“Për mua ti nuk di të luash,” komenton Iliri performancën e Iglit. “Problemi yt është ti nuk di të luash, si me veten, si me ambientin ku je.” “Ti mund të jesh mësuar të luash me veten, unë jo,” përgjigjet Igli.

Pas kësaj, Iliri thekson rolet – pra, Igli bën mirë të kujtojë se Iliri është kryetari i jurisë, ndërsa ai konkurrent. Qartë, Igli?

“Ti ke shumë inteligjencë dhe në vend që të përdorësh terma rruge, duhet të përdorësh terma profesionalë. A je profesionist 30 vite?” shton Igli. “Për mua e di çfarë je ti aty? Ti për mua je nxënës. Diletant,” përgjigjet Iliri.

“Kampionët dëgjojnë, jo Igli” – ironizon aktori. “Unë nuk luaj as me veten, as me të tjerët.”

Gjatë kohës së “Big Brother VIP”, Igli mbajti një marrëdhënie të ftohtë me të gjithë konkurrentët (Virgjëreshë në horoskop, nëse po pyesni veten). Shumë gjëra mund të kenë ndryshuar që prej asaj kohe, sepse jo më kot, gjatë një puntate të “Dance Albania”, kur do të gjykohej nga Shaqiri, tha se “shkoi si cjapi te kasapi”.