Të paktën 35 persona janë vrarë në një sulm pranë një qëndre mësimore në Kabul. Më shumë se 80 të tjerë u plagosën në sulmin e së premtes në kolegjin Kaaj në zonën Dasht-e-Barchi.

Shumica e viktimave ishin të rinjtë të cilët po përgatiteshin për provimin e radhës në momentin e shpërthimit të bombës. Deri më tani nuk dihet asgjë për përgjegjësit e tragjedisë. 

Shumë nga viktimat i përkisnin minoritetit Hazaras, pakicë e cila shpesh ka qenë e targetuar nga militantët e Shtetit Islamik. 

Dhjetra gra Hazara kundërshtuan ndalimin e tubimeve nga zyrtarët talebanë të vendit për të protestuar kundër dhunës të shtunën, njoftoi agjencia e lajmeve AFP.
Rreth 50 gra kënduan ndërsa marshonin në rrugë, duke bërë thirrje për t'i dhënë fund "gjenocidit Hazara".

Pas sulmit të së premtes, pamjet në mediat lokale dhe ato të shpërndara në rrjete sociale shfaqën qartë skena të dhimbshme: adoleshentë të shtrirë në korridoret e spitalit, trupa pa jetë, tavolina të përmbysura dhe rrënoja të mbetura nga institucioni arsimor.

"Nuk po e gjejmë atë asgjëkundi!"- dëgjohet të thotë një grua e cila kërkonte për motrën e saj 19-vjeçare në spital.

Sulmuesi raportohet se ka qëlluar mbi rojet jashtë qendrës, ka hyrë në një klasë dhe ka shpërthyer një bombë.

Dëshmitarët okularë thanë për BBC-në se shumica e viktimave ishin vajza – ato ishin ulur në rreshtin e parë, në momentin e shpërthimit. Një tjetër student i plagosur tha se në dhomë ishin rreth 600 persona kur ndodhi sulmi.

Burimi: BBC