Përpara se të diskutoni ribashkimin me një ish-partner, mbani mend këtë: Arsyen pse u ndatë.
Është e lehtë të kesh "amnezi të marrëdhënieve" pas një sërë ngatërresash romantike të pasuksesshme. Ndonjëherë njohjet ose lidhjet e dështuara, pas ndarjes, mund të bëjnë që pa kuptuar, të fillojmë të idealizojmë partnerët e vjetër. Dëshpërimi na lë në një pozitë të keqe kur bëhet fjalë për marrjen e vendimeve.
Për të kuptuar se ku ndodheni për momentin me lidhjen tuaj, duhet t'i bëni vetes një sërë pyetjesh. Ndoshta mund t'ju duhet ndihma e një miku të afërt për të kuptuar përgjigjet:
1. Pse u ndatë?
2. A po e idealizoni ish-partnerin tuaj dhe/ose lidhjen?
3. Çfarë ka ndryshuar që ju bën të mendoni se gjërat do të jenë ndryshe këtë herë?
4. Çfarë ka bërë ish-partneri juaj për t'u bërë një partner më i aftë, që nga ndarja? Po ju?
5. Nëse besimi është thyer në të dyja anët, a mund ta rindërtoni atë?
6. A jeni të dy të gatshëm të bëni punën që duhet për të riparuar atë që nuk funksiononte më parë? Si do ta bëni këtë "punë"?
Theksojmë veçanërisht pyetjen e tretë: Çfarë ka ndryshuar?
Problemet thelbësore që kanë ekzistuar dikur ka të ngjarë të vazhdojnë të ekzistojnë sapo të kaloni fazën e muajit të mjaltit. Nëse të dy nuk keni punuar me veten dhe nuk jeni rritur vërtet, nuk keni zhvilluar aftësi të reja - ka të ngjarë ta gjeni veten përsëri në të njëjtin vend ku ishit kur u ndatë.
Kur bëhet fjalë për të bërë ndryshime, ka katër hapa thelbësorë, pa të cilët një marrëdhënie nuk mund të rregullohet:
1. Pendimi. Një falje e përzemërt vjen kur kuptoni se sa e keni lënduar partnerin/en. Të thuash "më fal" nuk mjafton. Këto janë vetëm fjalë. Një falje e vërtetë nënkupton që e keni kuptuar dhimbjen që keni shkaktuar dhe tregon keqardhje për veprimet e ndërmarra.
2. Përgjegjësia. Kur merrni përgjegjësinë, i bëni të ditur personit tjetër se e kuptoni peshën e situatës që keni shkaktuar dhe e kuptoni atë që keni bërë gabim.
3. Njohja/pranimi. Kur njerëzit e dinë se dhimbja e tyre është kuptuar, kjo i ndihmon ata të shërohen.
4. Kura. Personi që bën ndryshime duhet të riparojë dëmin që është shkaktuar dhe të marrë masa për të shmangur përsëritjen e tij.
Nëse pas leximit të gjithë kësaj, ju ende mendoni se ribashkimi është gjëja e duhur, atëherë ia vlen ta provoni. Por filloni ngadalë. Kontaktoni ish-in dhe shihni nëse ai ose ajo është i gatshëm të takohet për të biseduar. Kaloni pak kohë së bashku. Shihni nëse lidheni si më parë. Ju mund të zbuloni se thjesht s'keni më ndjenja. Ose mund të zbuloni se historia juaj së bashku sapo ka filluar.
Burimi: In Style
