Shqipëria

Ndërprerja e energjisë elektrike pas orës 22:00: Ministrja Balluku sqaron qytetarët

Shkruar nga Anabel

7 Shtator 2022

Ndërprerja e energjisë elektrike pas orës 22:00: Ministrja
Foto ilustruese

Kriza e energjisë elektrike në botë ka bërë që shumë shtete europiane të marrin masa kufizuese në lidhje me energjinë dhe të ndërtojnë paketa të reja me qëllimin e vetëm për të mos e shpërdoruar dhe kursyer energjinë elektrike. 

Pasojat e krizës padyshim që ndihen edhe në vend. Prej pak javësh qarkullon një lajm që thotë se pas orës 22:00 vendit do t'i ndërpritet energjia elektrike. Sa e vërtetë është kjo? 

Gjatë një komunikimi të sotëm për mediat, Ministrja e Energjisë dhe Infrastrukturës, Belinda Balluku sqaroi qytetarët në lidhje me planet dhe vendimet e reja që priten të ndërmerren. 

Balluku mohoi lajmin duke thënë se nuk është në planet e qeverisë që të ndërpritet energjia nëpër shtëpi/institucione, etj pas orës 22:00. Ndërprerja e vetme thuhet se do të jetë ajo e ndriçimit publik.

“Pas orës 22:00 kërkohet ndërprerja e ndriçimit publik. Gjermania e ka aplikuar këtë dhe do të thoja që aplikimi i ndriçimit publik, i njësive tregtare dhe gjithçkaje tjetër ndodh nga ora 16:00 deri në orën 22:00. Vetëm ai interval lejohet që të ketë drita të ndezura, por po flasim gjithmonë për ambientet publike. Pas atij momenti fiken dritat deri në ditë tjetër, në orën 16:00.

E ka nisur Gjermania, po e aplikojnë edhe shtete të tjera. Është pjesë e paketës së kursimit të energjisë. Ne nesër së bashku me kryeministrin do të bëjmë prezantimin e paketës për energjinë për sa i përket edhe fashës 800 kw/h që do të fillojë aplikimi nga 1 tetori, edhe disa masa të tjera drastike që ne do duhet të ndërmarrim në vazhdim.

Disa janë marrë si praktikat më të mira nga shtetet e tjera europiane, disa janë përshtatur me kërkesën e vendit tonë."- u shpreh ajo.

Ministrja shtoi se që nga 1 tetori faturimi i energjisë elektrike nuk do të jetë i njëjtë për të gjithë. Nëse aktualisht është me 9.5 lekë për kilovat, gjatë dimrit faturimi do të bëhet me fasha. Që do të thotë se ata që shpenzojnë më shumë se 800 kilovat do të paguajë më shumë.

Burimi: Abc News

MOS I HUMBISNI