Britney Spears i është rikthyer muzikës. Siç u raportua, është pjesë e projektit të fundit të legjendës Elton John.

Kur gjashtë vjet më parë Spears publikoi albumin e saj të nëntë "Glory", jo shumë njerëz prisnin që artistja të zhdukej papritur nga skena muzikore për vite me radhë. Midis 1999 dhe 2001, Princesha e Popit publikoi një album të ri çdo vit. Edhe më vonë, Britney nuk qëndroi larg muzikës për periudha të gjata.

Pasi Spears “u lirua” përfundimisht nga kujdestaria në nëntor 2021, ishte e paqartë nëse këngëtarja do të performonte përsëri.

Por tani ajo është rikthyer zyrtarisht, me mbështetjen e një prej ikonave më të mëdha të muzikës, Elton John. Të premten, të dy publikuan këngën e tyre "Hold Me Closer", një këngë që ndërthur disa nga hitet e mëparshme të John, duke përfshirë "Tiny Dancer", "Don't Go Breaking My Heart" dhe "The One".

“Jam i emocionuar me komentet ndaj ‘Hold Me Closer’! Doja të bëja një këngë argëtuese, të lumtur verore, kështu që u frymëzova kur Britney pranoi të ishte pjesë e kësaj kënge! Ajo është me të vërtetë një ikonë, një nga yjet më të mëdhenj të pop-it të të gjitha kohërave dhe e dua shumë. Shpresoj t'ju pëlqejë të gjithëve. “- shkroi Elton John.

Kënga është perfekte për t’u dëgjuar në makinë, teksa ecni me zemrën tuaj (ose miqtë) në një rrugë buzë detit, rrezet e diellit ju përkëdhelin fytyrën ndërsa era luan me flokët tuaj. Shijojeni!