Kryeministrja finlandeze Sanna Marin ka rezultuar negative për konsum të çdo lloj droge, deklaron qeveria, pasi ajo u pa duke kërcyer, duke kënduar dhe duke pirë në një festë të fundit.
Marin, 36 vjeçe, pranoi të bënte testin për të zbutur shqetësimet për sjelljen e saj.
Ajo thotë se nuk ka marrë kurrë drogë dhe mohon të ketë bërë diçka të paligjshme në festë, por thotë se ka pirë alkool.
Një video e publikuar ajo shfaqet duke festuar me miq.
Një deklaratë e qeverisë tha se "asnjë drogë nuk u gjet" në test. Deklarata shtoi se kryeministrja i ka paguar vetë shpenzimet e testit.
Këshilltarja speciale e kryeministres, Iida Vallin, tha se mostra e urinës ishte testuar për kokainë, amfetaminë, kanabis dhe opioidë.
Pas publikimit të videove, Sanna Marin u përball me kritika nga disa politikanë, dhe një lider i partisë opozitare i kërkoi asaj të bënte një test droge.
Zonja Marin nuk e ka fshehur asnjëherë anën e saj "festive" dhe shpesh është fotografuar në festivale muzikore.
Vitin e kaluar ajo kërkoi falje që shkoi në klub pasi pati kontakt të ngushtë me dikë që rezultoi i infektuar me Covid-19. Në fillim të këtij muaji, Marin u quajt "kryeministrja më e lezetshme në botë" nga gazeta gjermane Bild.
Ndërkohë, edhe njerëzit në rrjete sociale si Instagram, LinkedIn etj., kanë qenë kryesisht mbështetës ndaj kryeministres.
Kush është Sanna Marin?
- Në vitin 2019, në moshën 34-vjeçare, Sanna Marin u bë kryeministrja më e re në botë pasi u zgjodh nga partia e saj për të pasuar ish-udhëheqësin Antti Rinne.
- Ajo vjen nga një prejardhje modeste. Prindërit e saj u ndanë kur ajo ishte e re dhe në vitet e hershme nëna e saj e rriti vetëm.
- Në vitin 2015, Marin foli për stigmën që hasi kur nëna e saj ishte në një lidhje me të njëjtin seks.
- Pasi studioi në Universitetin e Tamperes dhe shërbeu në qeverisjen lokale, ajo u zgjodh në parlamentin e Finlandës në vitin 2015, në moshën 29-vjeçare.
Burimi: BBC
