
Dje (14 gusht) atmosfera në Tiranë ishte thjesht WoW dhe ju e dini pse! Ashtu siç premtoi, Noizy realizoi koncertin e tij “Alpha Show” dhe rezultoi vërtet siç reperi na paralajmëroi: ‘Be there or be pishman’. Të gjithë ata që për një arsye ose tjetrën nuk mundën ta shihnin nga afër koncertin (pavarësisht se u bënë "pishman"), e ndjenë energjinë nga muzika në qytet, atmosfera që u krijua në Instagram prej videove të postuara apo nga rrëfimet e miqve që ishin pjesë e eventit.

Reperi doli në skenë rreth orës 23:00 dhe "Alpha Show" u hap me këngën legjendare "OTR me zemër". Para se Noizy të performonte, ngritja e kurorës (simboli i grupit OTR) elektrizoi gjithë sheshin "Nënë Tereza" dhe që aty u duk se nata do të ishte e gjatë dhe me shumë energji...
View this post on Instagram
E gjithë puna e disa dekadave, duket se u shpërblye mbrëmjen e djeshme për Noizy-n pasi si asnjëherë më parë koncerti shënoi shitje rekord biletash- mbi 15,000 njerëz ishin aty për të shijuar muzikën e tij. Për herë të parë reperi këndoi live bashkë me bandën dhe nëse kishte diçka me tepri ishin surprizat.

Ardhja në skenë e Dudës, një prej bashkëpunëtorëve të grupit OTR i bëri të rinjtë e kryeqytetit shumë nostalgjikë për adoleshencën, por entuziazmi i publikut arriti kulmit pas ardhjes së Stresit.

Reperi dikur (ish-armik i përbetuar) i Noizy-it dhe grupit të tij u ngjit në skenë, u përqafua me të dhe bashkë kënduan këngën "Lambo".

Ndonëse koncerti mbaroi, atmosfera, kujtimet dhe momentet gjatë "Alpha Show" njerëzit me siguri do t'i kujtojnë gjatë.