“Ti e kupton që ke arritur suksesin kur ngjitesh në skenë dhe nuk të duhet të këndosh,” shkroi dikush në TikTok për dyshen fantastike Lyrical Son dhe MC Kresha.

Specat performuan në “Sunny Hill Festival” dhe elektrizuan publikun gjatë gjithë kohës kur ishin në skenë, por duhet pranuar që momentin kulminant e shënoi kënga “Semafori”.

“Herën e kaluar kur kemi qenë në festivalin ‘Sunny Hill’ kemi bërë një gabim unë dhe Lyrical dhe duam t’ju kërkojmë falje sepse kemi vjedhur momentin më të mirë të jetës sonë – nuk ju kemi lënë të këndoni atë që keni dashur më shumë.” – tha MC Kresha.

Fill pas kësaj, nis kënga “Semafori” nga albumi “Muzikë e Alltisë” dhe turma shpërthen në brohoritje. Njerëzit këndojnë nga fillimi në fund të gjithë këngën. Videoja e shpërndarë në TikTok nga një përdoruese është tashmë virale dhe e shpërndarë kudo nëpër rrjete sociale.

“Blini sa të doni klikime, nëse s’këndojnë kështu për ju në Sunny Hill, s’jeni artistë,” shkruan dikush në TikTok. “Shumë atmosferë e papërshkruar me fjalë. Respekt,” thotë një tjetër. “Çfarë energjie," “Mishi kokrra," "WOW! Fuqia që kanë këta të dy në skenë," janë disa komente të radhës.

Për ju që e keni humbur, ja videoja: