Që prej orës 14.00 të ditës së djeshme, Sunny Hill Festival është qendra e vëmendjes në rrjetet sociale për shkak të formatit të festivalit (4-ditor), përmasave të organizimit sipas standardeve ndërkombëtare dhe padyshim listës së artistëve. Në vijim të këtij artikulli do të gjeni një përmbledhje të ndodhive të fundit të festivalit i cili mund të konsiderohet si eventi më i madh i këtij lloji i organizuar ndonjëherë në Kosovë dhe Shqipëri.

Nata e parë – kush interpretoi

Galoski, Sahati, Art Lokaj & Eros, Jimpong & Friends, Sancet, Sytë ishin disa nga artistët që performuan për mbi 20,000 pjesëmarrës (numër i bërë publik nga një prej organizatorëvë të festivalit). Në orët e mbrëmjes, Kida, Ylli Limani dhe Elvana Gjata elektrizuan skenën.

Në një moment, publiku surprizoi të atin e Elvanës, i cili festonte ditelindjen.

Dua Lipa në skënë

Ndryshe nga edicioni i kaluar ku nuk performoi, këtë herë Dua u rikthye në shtëpi për të mos e ndjekur festivalin nga tribuna. E veshur si një Barbie rozë, këngëtarja interpretoi disa nga hitet e saj që e shndërruan në një yll ndërkombëtar.

“E kam pasur mendjen gjithë ditën te performanca. Shpresoj që t’ju pëlqej dhe të kënaqeni shumë sonte. Faleminderit shumë,” tha Dua në një konferencë për mediat.

Fushata #SETMEFREE, #VisaFreeKosovo

“Sunny Hill Festival ju fton të thoni me zë të lartë #SETMEFREE për një #KosovëPaViza! Njëmbëdhjetë vjet përmes një procesi të bllokuar integrimi, ne jemi të vetmit që nuk mund të kalojmë lirisht kufijtë pa vizë. Por ndërsa BE-ja vendos kufijtë rreth lirisë sonë, ne do të mbajmë imagjinatën tonë të gjallë për t'u çliruar.” – shkruan organizatorët. Ata u kërkuan pjesëmarrësve të përdorin hashtag-et për t’i dhënë zë çështjes së vizave për shqiptarët e Kosovës.

“Më shumë po gëzohem që të rinjtë tanë kanë mundësi të jenë pjesë e një eventi të tillë edhe i shohin artistët që nuk kanë mundësi t’i shohin çdo ditë. Sot e fillojmë fushatën “Set Me Free”, e cila po shpresojmë që në katër ditët e ardhshme do të shpërndahet në mediat sociale nëpër botë dhe zëri i të rinjve do të ndihet”- tha i ati i Duas, Dukagjin Lipa.

Sunny Hill Festival do të vazhdojë deri më 7 gusht.