Beyoncé thotë se do të heqë nga albumi “Renaissance” një fjalë që konsiderohet fyerje për njerëzit me nevoja të veçanta pasi u përball me reagime dhe kritika në internet.

Këngëtarja mori vlerësime të shumta kur publikoi albumin e fundit, por u kritikua gjatë fundjavës kur fansat vunë re përfshirjen e një termi nënçmues në këngën "Heated". Në këngën e shkruar nga Drake, Beyoncé këndon vargun: "Spazzin' on that ass, spazz on that ass."

Edhe pse fjala "spaz" përdoret shpesh për të përshkruar “euforinë për shkak të emocioneve të shumta”, ajo rrjedh nga fjala "spastic", e cila konsiderohet nënçmuese për njerëzit me paralizë cerebrale spastike. Sipas Qendrave për Kontrollin dhe Parandalimin e Sëmundjeve (CDC), çrregullimi ndikon në aftësinë e një personi për të kontrolluar muskujt e tyre, veçanërisht në krahët dhe këmbët.

Në qershor, Lizzo u kritikua gjithashtu për përdorimin e të njëjtit term në këngën “Grrrls”. "Kështu që Beyoncé përdori fjalën 'sp**' në këngën e saj të re 'Heated'. Ndjehet si një shuplakë në fytyrë për mua, komunitetin me aftësi të kufizuara dhe përparimin që u përpoqëm të bënim me Lizzo," shkroi aktivistja Hannah Diviney.

Një përfaqësues i Beyoncé-s tha për mediat se teksti do të ndryshojë. “Fjala, e pa përdorur qëllimisht në mënyrë të dëmshme, do të zëvendësohet”, thuhet në deklaratë.

Sense, një organizatë bamirësie në lidhje me njerëzit me nevoja të veçanta, shkroi në Twitter:

“Beyonce ka një histori përsa i përket përkrahjes së gjithëpërfshirjes dhe ne jemi të lumtur që ajo ka dëgjuar komentet dhe ka rënë dakord të riregjistrojë tekstin që shumë njerëz me aftësi të kufizuara e konsiderojnë fyes. Ne e kuptojmë se fjala nuk është përdorur qëllimisht për të shkaktuar dëm, por fjalët kanë fuqi dhe mund të përforcojnë qëndrimet negative me të cilat përballen grupet e margjinalizuara. Ne duam të falënderojmë Beyoncé që na dëgjoi dhe mezi presim të vazhdojmë të shijojmë këngën.”