Seksi, gjinia, femër, mashkull, grua, burrë, trans-burrë, trans-grua etj., janë terma të përhapur kohëve të fundit. Nëse kohë më parë, seksi dhe gjinia përdoreshin si sinonim i njëri-tjetit, në ditët e sotme seksi i referohet organit gjenital dhe përcaktohet në lindje, ndërsa gjinia është një term shoqëror me të cilin individi identifikohet. Sot, njerëzit mund të mos identifikohen as si grua dhe as si burrë; po kështu mund të kenë lindur me penis dhe të identifikohen si grua ose me vaginë dhe të identifikohen si burrë. Pra, çfarë është një grua?
“What is a woman?” (Çfarë është një grua?) është një dokumentar i përfolur së fundmi që përpiqet t’i japë përgjigje pyetjes. E meqë jemi këtu, pa u thelluar më tej te dokumentari, po rendisim paraprakisht disa përgjigje të ndjekësve tanë në Instagram mbi pyetjen “Çfarë është një grua?”.
1. E vështirë ta përkufizosh.
2. Njeri që ka mitër, gjinj të zhvilluar, menstruacione.
3. Qenie njerëzore që është e aftë të prodhojë vezë.
4. Njeri me vaginë dhe vezore dhe kromozomet XX.
5. E kundërta e mashkullit.
6. Seksi që i atribuohet individit që në lindje. Grua është gjinia me të cilin identifikohet vetë njeriu.
7. Njeri.
8. Njeri me kromozome XX.
“Çfarë është një grua?” është një dokumentar mbi çështjet gjinore dhe transgjinore i prezantuar nga komentatori politik konservator Matt Walsh, prodhuar dhe publikuar nga The Daily Wire, me regji të Justin Folk. Reagimet ndaj dokumentarit pas publikimit janë të ndara në dy pjesë.
Dokumentari shfaq Walsh duke pyetur "Çfarë është një grua?" dhe pyetja iu drejtohet një sërë njerëzish, duke përfshirë specialistë në pediatri, studime gjinore, psikiatri, kirurgji të ndryshimit të seksit, psikologë dhe kundërshtarë të lëvizjeve transgjinore. Walsh diskutoi gjithashtu termat "jo-binar" dhe "transgjinor" me një fis Maasai në Kenia dhe intervistoi një burrë homoseksual. Dokumentari diskuton kirurgjinë e ndryshimit të seksit dhe atletët transgjinorë në sportet e grave.
Walsh thotë se donte që dokumentari të ishte i ndryshëm nga prodhimet e tjera të krahut të djathtë: "Ne nuk jemi të interesuar të sjellim një grup njerëzish me të cilët jam dakord në një dhomë, duke u bërë atyre pyetje vetëm që të më japin një përgjigje që mund ta kisha thënë vetë,” thotë ai. Në vend të kësaj, Walsh donte të fliste me njerëzit me të cilët nuk ishte dakord për të marrë përgjigjet që kërkonte.
Vetëm traileri i dokumentarit ka mbi 23 milionë shikime në Youtube, ku në pjesën më të madhe njerëzit e vlerësojnë. Po ashtu ka edhe komente që thonë Walsh injoron lëvizjet transgjinore.
“Çdo histori ka 2 anë. Dëgjoni këtë anë dhe më pas bëni konkluzionet tuaja,” shkruan dikush. Thënë kjo, në fund vendoseni ju çfarë është një grua.
