Putin kushtëzon eksportet e drithërave të Ukrainës me lehtësimin e sanksioneve

Presidenti i Rusisë, Vladimir Putin, ka kushtëzuar rihapjen e mundshme të eksporteve të drithërave të Ukrainës me një lehtësim të sanksioneve, që perëndimi vendosi ndaj Moskës pas nisjes së pushtimit të Ukrainës.

Presidenti i Francës dhe kancelari i Gjermanisë iu përgjigjën duke i thënë se për lehtësimin e sanksioneve duhet tërheqja e trupave rus dhe përpjekje të vërteta për paqe nga ana e Moskës.

Kryeministri britanik, Boris Johnson, ndërkaq i tha presidentit ukrainas, Volodymyr Zelensky, se shteti i tij dhe partnerët e G7-s po punojnë për të ndihmuar Ukrainën që të rikthejë eksportet e drithërave.

Ukraina është një prej eksportuesve më të mëdha në botë të grurit, misrit dhe vajit të lulediellit, por forcat ruse aktualisht kanë bllokuar portet e saj në Detin e Zi, duke vënë në rrezik furnizimet botërore.

Donald Trump thotë se SHBA-ja duhet të financojë në shkolla, jo për Ukrainën.

Ish-presidenti amerikan Donald Trump i bënte thirrje dje përfaqësuesve të vendit se duhet të kenë prioritet financimin e sigurisë në shkolla dhe jo dërgimin e armatimeve për Ukrainën. Kjo deklaratë erdhi pak ditë pas tragjedisë së ndodhur në shkollën fillore të Texas-it, ku mbetën të vrarë 19 fëmijë dhe 2 mësues.

Teksa fliste në një konferencë pro-armëve, Trump hidhte dyshime mbi faktin se SHBA ka miratuar ” $40 miliardë në ndihma ushtarake për Ukrainën” kur nuk arrin të sigurojë mbrojtjen e shkollave e fëmijëve të saj.

“Para se ne të kërkojmë të ndërtojmë pjesën tjetër të botës, ne duhet të krijojmë shkolla të sigurta për fëmijë tanë në vendin tonë,” -u shpreh ai.

Pak ditë para jubileut të madh, "rojet e mbretëreshës" arrestohen për drogë

Gjashtë ushtarë britanikë dhe një veteran i larguar nga forcat, janë arrestuar për aktivitetin e tyre në një rrjet shpërndarjeje kokaine dhe pastrimi parash, disa ditë para përvjetorit të madh të fronit të mbretëreshës.

Të dyshuarit u ndaluan pas një hetimi të policisë ushatarake mbretërore. Gjashtë roje irlandeze i përkisnin batalionit ceremonial të Gardës Irlandeze të cilët pritet të drejtojnë paradën ushtarake “Trooping the Color” që do të celebrojë të enjten 70 vjetorin e monarkes në fron.

“Ushtria nuk toleron asnjë sjellje ilegale apo kriminale. Çështja është tashmë objekt i hetimeve të Policisë Ushtarake Mbretërore prandaj nuk është e udhës të komentohet më tej”.- shkruhej në deklaratën e ushtrisë mbretërore. Vetë pallati mbretëror Buckingham Palace nuk iu përgjigj interesit të mediave për komente mbi çështjen problematike.

Ekspertët thirrje OBSH-së për linë e majmunëve: Të veprohet më shpejt

Ekspertët e sëmundjeve infektive kërkojnë që Organizata Botërore e Shëndetësisë (OBSH) të veprojë më shpejt për të frenuar përhapjen e lisë së majmunëve, rastet e së cilës tashmë janë konfirmuar në 20 shtete.

Sipas tyre, qeveritë në botë dhe OBSH-ja nuk duhet të përsërisin gabimet kur u shfaq pandemia e COVID-19, ku u gjenden të papërgatitura për zbulimin e rasteve, shkruan Reuters.

Edhe pse lija e majmunëve nuk është aq e transmetueshme apo e rrezikshme sa COVID-19, ekspertët thonë se duhet të ketë udhëzime më të qarta se si duhet të izolohet një person i infektuar, si të mbrohen ata që rrezikohen të infektohen dhe për testimet apo gjurmimet e rasteve.

Sipas OBSH-së deklaron se në mbarë botën janë rreth 200 raste të konfirmuara, shifër që mund të jetë maja e ajsbergut, teksa edhe Europa po përballet me rritje të të infektuarve.

Burimi: CNN, BBC, Reuters