Benjamin Netanyahu reagon për urdhër arrestin: “Është sulm ndaj Izraelit”

Benjamin Netanyahu u shpreh se vendimi i prokurorit të Gjykatës Ndërkombëtare Penale, ishte një “turp” dhe një sulm ndaj Izraelit. Prokurori në fjalë, Karim Khan, u shpreh se ai ka kërkuar lëshimin e urdhër arresteve për udhëheqësit e Hamasit dhe Benjamin Netanyahu, të cilët akuzohen për krime lufte dhe krime kundrejt njerëzimit në Rripin e Gazës.

Netanyahu nënvizoi se “kjo përpjekje do të dështojë totalisht”. “Tetëdhjetë vjet më parë, populli hebre ishte plotësisht i pambrojtur përballë armiqve tanë. Ato ditë kanë mbaruar. Tani, populli hebre ka një shtet dhe ne kemi një ushtri për të mbrojtur shtetin tonë”, shtoi ai.

Gaza/ OKB pezullon ndihmat në Rafah

Organizata e Kombeve të Bashkuara pezulloi shpërndarjen e ushqimeve në Rafah, për shkak të furnizimeve dhe situatës së vështirë të sigurisë, e shkaktuar nga zgjerimi i operacionit tokësor dhe ajror që Izraeli po kryen në këtë zonë. Kombet e Bashkuara paralajmëruan operacionet humanitare se po shkojnë drejt kolapsit.

Sulmi në Rafah u krye pavarësisht kundërshtimeve të shumta edhe nga presidenti Joe Biden. Qyteti i mbushur me civilë nuk u kursye dhe mijëra jetë vijojnë të merren padrejtësisht nga lufta e ashpër që Izraeli po kryen në Rripin e Gazës.

Siri/ Zonja e parë e vendit diagnostikohet me leuçemi

Presidenca e Sirisë bëri me dije se zonja e parë e shtetit, Asma Al-Assad, është diagnostikuar me leuçemi akute, pasi ka kaluar më parë edhe kancerin në gji. Në deklaratë nënvizohet se Asma do të ndjekë terapi.

Terapia në fjalë kërkon izolim, andaj ajo nuk do të mund të marrë pjesë në evente dhe aktivitete të ndryshme. Zonja e parë do të kryejë terapinë me vullnet dhe besimin në Zot dhe shfaqet optimiste.

Ukrainë/ Mbi 3000 të burgosur kërkojnë t’i bashkohen ushtrisë

Në Ukrainë, mbi 3000 të burgosur kërkojnë të lënë burgun dhe t’i bashkohen ushtrisë, pasi u vendos sipas ligjit që të lejoheshin disa kategori të dënuarish që të mund t’u bashkohen forcave të armatosura ukrainase.

Të njëjtën lëvizje ka bërë edhe më parë Rusia, e cila me premtimin për amnisti, i ka rreshtuar në radhët e ushtrisë shumë të burgosur, për t’i dërguar në luftë në Ukrainë.

Aktualisht, Ukraina është duke u përballur me mungesë të forcave ushtarake dhe municioneve, çka ka sjellë dhe përparimin e ushtrisë ruse në territore të ndryshme.