Opinionistja e reality show-t “Big Brother Albania”, poetja Mimoza Ahmeti, ka deklaruar në faqen e saj në Facebook se është në dyshim për vazhdimësinë e pjesëmarrjes së saj në këtë spektakël. Shkak për këtë, sipas saj, është bërë një foto e montuar nga opinionisti Olti Curri mbi debatin e saj me banorin e larguar nga shtëpia javën e kaluar, Edisonin. Mimoza sugjeron se kjo fotografi është bërë qëllimisht për të krijuar një konflikt mes saj dhe Edisonit. Ajo gjithashtu tregon se ky i fundit i ka treguar se atij i është bërë një video e cila transmetohet me shkurtime dhe sipas tij edhe kjo ishte bërë nga Olti Curri, të cilin e quan ‘gazetar të Top Channel. “I thashë O.Currit, ‘O vëre të plotë, o hiqe atë video’, ai më tha ‘e di vetë ça bëj me faqen time’,” shkruan Mimoza.
Mimoza Ahmeti njihet gjerësisht nga publiku shqiptar si një person mendjehapur që nuk është shqetësuar kurrë për çka kanë thënë të tjerët për të dhe është e çuditshme sesi një person kaq i lirshëm të preket nga diçka që dihet se bëhet ekskluzivisht pë të shkaktuar humor.
Ajo vazhdoon më tej duke shtuar se i ka kërkuar organizatores së spektaklit, Zefina Hasani, numrin e telefonit të Edisonit por ajo nuk ia ka dhënë e madje sipas Mimozës, ajo edhe i ka fikur telefonin.
“Kjo mungesë korrektësie, duke më fikur edhe telefonin, më bën të mendohem edhe një herë, nëse pjesëmarrja ime në Big Brother si opinioniste do të vazhdojë apo jo. Edisoni më priti me shumë mirëkuptim dhe më dha fjalën se nesër do të paraqitemi të dy në media për të deklaruar këtë papërgjegjësi të rrezikshme,” shkruan ajo.
Mimoza rrëfen se gjithashtu ka tentuar të komentojë në faqen në Facebook të “Big Brother Albania” nën foton në fjalë por komenti i saj fshihej në moment, gjë që ajo e quan një “censurë të frikshme”.
Edhe Olti Curri ka reaguar për këtë ngjarje. Ai ka shkruar në Facbook duke iu drejtuar drejtpërdrejt Mimoza Ahmetit se posterat që ai krijon, janë pjesë e humorit ët tij dhe se ajo, duke qenë vetë një person që e përdor humorin, duhet ta kuptonte një gjë të tillë. “Nëse humori im është ndryshe nga i joti duhet të tregosh edhe tolerancë. Unë jam Olti Curri gazetar i ‘Olti Curri fan-page’, blog me komente për spektakël & art. Kam një emision në Top Albania Radio por vijen editoriale të faqes time nuk e cakton absolutisht Top Channel,” shkruan ai.
Olti shprehet se mbi akuzat se ai ka tentuar të krijojë një konflikt midis Mimozës dhe Edisonit nuk ka koment, por megjithatë ai uron që ajo të vazhdojë të jetë opinionistja e spektaklit. Në fund, ai e sqaron Mimozën se faqja ku asaj i janë fshirë komentet, nuk është faqja zyrtare e “Big Brother Albania”.
Ndërkohë ende nuk ka një reagim nga organizatorët e reality show-t.
#showbiz
