Ndodh shumëëë rrallë që Xhemi Shehu të flasë për jetën private, por kur e bën, zgjedh të jetë e qartë! E ftuar mëngjesin e sotëm në "Wake Up", Top Channel, moderatorja u ndal tek zërat që nisën të qarkullonin për një ndarje të mundshme nga bashkëshorti.
Thashethemet nisën pas një batute që ajo vetë bëri, duke iu referuar vetes si "ish-gruaja e Visit".
“Ishte një batutë, nuk jam ndarë, pavarësisht se nuk kam unazat. I heq herë pas here kur dua të lyej duart me krem në darkë dhe harroj t’i vendos. Unazat janë thjesht aksesorë”.- u shpreh Xhemi, duke u shuar kështu një tjetër dilemë kureshtarëve që vrisnin mendjen pse Shehu nuk mban unazën e martesës.
Në lidhje me djemtë e saj, që gjithashtu zgjedh t'i mbajë shumë larg kamerave dhe rrjeteve sociale, Xhemi tregoi se është një mami diku midis "liberales" dhe "striktes".
"Prindërimit nuk ia merr dorën asnjëherë. Fëmijët janë një zbulim i ri çdo ditë. Çdo ditë nxjerrin diçka të re. E gjej veten shpeshherë në situata që nuk di të sillem. Jam ‘tërhiq e mos e këput’, pra edhe duhet të jem liberale, edhe strikte”.
Nëse prindërimi është shkollë më vete që nuk mbaron kurrë, raportin me njerëzit, Xhemi e ka shumë më të qartë tani që është "rritur".
"Me njerëz që kam punuar dhe nuk i kam më në Instagram, janë njerëz që nuk do të punoja më. Pra nuk do të kem më asnjë lloj raporti, as miqësor as profesional. Janë ata që më kanë bërë të ndihem keq dhe tani jam në një pikë që nuk bëj më kompromise për hir të asgjëje."- përfundoi ajo, duke vërtetuar edhe njëherë që të shprehurit të gjërave troç dhe kaq thjeshtë është virtyt që e zotëron më së miri!
