Për shkak të vonesave nga autoritetet në sigurimin e licencave të nevojshme për vendndodhjen, Sunny Hill Festival për herë të parë nuk do të organizohet në Kosovë, por vendndodhja e këtij edicioni do të jetë Tirana.
“Të njëjtat data, e njëjta përvojë e bukur, vendndodhja ndryshe! Këtë gusht (për shkak të vonesave nga autoritetet në sigurimin e licencave të nevojshme për vendndodhjen), jemi të detyruar të shkojmë në Tiranë.” – njoftoi së fundmi festivali, i cili organizohet nga Dua Lipa dhe i ati i saj, Dukagjin Lipa.
View this post on Instagram
Pavarësisht rimbursimit të biletave për ata që nuk do të mund të udhëtojnë dot drejt Tiranës, njerëzit duken të zhgënjyer.
“Nuk kam asgjë me vëllezërit tanë shqiptarë, por Sunny Hill është diçka që bëhet për Kosovën,” shkruan dikush. “Duhet të ishin marrë masat shumë herët” lexohet në një tjetër koment. “Po pak arra ka në Kosovë?” ironizon një tjetër.
Të ardhurat e fituara nga biletat e shitura nga festivali shkojnë për “Sunny Hill Foundation”, që u themelua rreth 5 vjet më parë. Ceremonia hapëse e tij u organizua përmes koncertit që Dua mbajti asokohe në Prishtinë ku premtoi se gjithë të ardhurat do të shkonin për bamirësi.
