Një dash në Sudanin e Jugut është dënuar me tre vjet burg pasi u shpall fajtor për vrasjen e një gruaje.
Sipas radios Eye Radio në Sudan, dashi u arrestua nga policia në fillim të këtij muaji pasi sulmoi 45-vjeçaren Adhieu Chaping. Dashi e goditi vazhdimisht zonjën Chaping me kokë, duke i thyer brinjët. 45-vjeçarja ndërroi jetë menjëherë për shkak të plagëve të marra, raporton NDTV.
Duke folur për median, një përfaqësues lokal tha: "Pronari është i pafajshëm dhe dashi është ai që ka kryer krimin, kështu që meriton të arrestohet dhe më pas çështja do të kalojë në gjykatën zakonore ku çështja mund të zgjidhet në mënyrë miqësore."
Ladbible raporton se dashi do të kalojë tre vitet e ardhshme në një kamp ushtarak. Gjykata lokale ka vendosur që pronari i dashit, Duony Manyang Dhal, do të duhet gjithashtu t'i dorëzojë pesë lopë familjes së viktimës.
Zoti Dhal shumë të ngjarë të humbasë dashin në fund të dënimit pasi ligjet zakonore në rajon thonë se çdo kafshë shtëpiake që vret një person i jepet më pas si kompensim familjes së viktimës.
Sistemi ligjor i Sudanit të Jugut, i cili fitoi pavarësinë nga Sudani në vitin 2011, është ndërtuar mbi ndërthurjen e ligjeve statutore dhe zakonore. Sudani i Jugut ka miratuar dhjetëra ligje që nga viti 2005, por përdorimi i tyre në mosmarrëveshje ligjore dhe gjykata është i kufizuar.
