Cilat do të jenë tendencat e arredimit për këtë vit? A ka ndonjë detaj të veçantë? Çfarë duhet të kemi parasysh kur arredojmë hapësirën e banesës sonë? Çfarë kanë karakteristike shtëpitë në Shqipëri? Për këto pyetje dhe detaje të tjera Anabel kontaktoi me arkitekten Persida Shkrepa, bashkëthemeluese e APPA Architects.
Mund të duket si pyetje klishe, por është e pashmangshme: Cilat janë disa nga tendencat e arredimit për vitin 2022?
“Tendencat e arredimit për vitin 2022 janë ngjyrat e guximshme, eksentrike dhe printet me motive. Format e lakura, harkuara, (soft shapes) janë gjithashtu tendencë e projektimit për vitin 2022. Mbizotëron stili minimalist, qasja “less is more”. Përpos ngjyrave, tendencë e këtij viti është ndërthurja me natyrën, të sjellim të jashtmen brenda. Paletat e ngjyrave janë ngjyrat e ngrohta, por edhe të forta. Ngjyra e vitit është jeshilja e ullirit dhe ajo e bizeles. Në vitin 2021 mbizotëronte ngjyra gri e cila përdorej për të shkrirë dizajnin, këtë vit ngjyra gri është zëvendësuar nga ngjyra bezhë.”
View this post on Instagram
A vihen re këto tendenca edhe në Shqipëri, apo mbizotëron ndonjë stil tjetër?
“Stili i dizajnit në interior në Shqipëri influencohet shumë nga vendet e lindjes, kryesisht vendet arabe për luksin e tepërt, që vihet re në përdorimin e materialeve si mermer, gold etj. Por, duhet të pranojmë se klientët janë edukuar përsa i përket rëndësisë që i jepet arkitektëve dhe besimit. E thënë kjo, dalim në përfundimin se në Shqipëri ecim paralelisht me trendet botërore të arredimit.”
Çfarë mund të veçoni te tendencat e arredimit në Shqipëri? A ka diçka që bie në sy më së shumti?
“Tencencat e arredimit në Shqipëri janë kryesisht kontemporane ose neoklasike. Si në çdo fushë tjetër, edhe këtu ne ndahemi në 50:50 (qesh).”
Gjatë punës suaj në APPA Architect dhe projekte të tjera, a keni vënë re ndonjë element, stil, qasje ose çfarëdo detaji që është i pranishëm pothuajse në çdo kohë?
“Materiali i drurit dhe ngjyrat e tokës janë elementë të pandarë si dhe rezistojnë në kohë. Kur projekton me këto dy komponentë, je gjithmonë në zonë të sigurt.”
View this post on Instagram
Mendoni që duhet të kemi parasysh diçka kur vendosim të arredojmë hapësirën e shtëpisë sonë?
“Kur vendosim të arredojmë hapësirën ku banojmë, duhet të kemi kujdes në ndarjen funksionale, e cila është hapi kryesor në projektim, si dhe të mos e harrojmë raportin e metrave katrorë me ngjyrat dhe materialet që do të përdorim.”
View this post on Instagram
A janë tendencat në përgjithësi diçka që duhet t’i marrim në konsideratë apo duhet të nisemi vetëm nga qasja dhe stili ynë personal?
“Stili dhe mënyra e jetesës së çdokujt si edhe tendencat e projektimit ecin paralel. Nuk mund të projektohet me të njëjtin stil për një avokat, mjek, muzikant. Për secilin klient, krijohet një profil dhe arredimi projektohet në mënyrë unike.”
