Elon Musk arriti një marrëveshje prej 44 miliardë dollarësh për të blerë Twitter-in. Kjo marrëveshje do t'i japë njeriut më të pasur në botë kontrollin e rrjetit social me më shumë se 200 milionë përdorues.
Drejtori ekzekutiv i Tesla-s do të vendoset në krye të një kompanie të cilën e ka kritikuar shpesh, duke pretenduar se nuk ka përmbushur potencialin e saj si një platformë për "fjalën e lirë". Marrëveshja u vendos pas disa javësh spekulimesh për të ardhmen e rrjetit social, nxitur nga fakti që Musk u bë aksioneri më i madh i platformës më 4 prill.
“Fjala e lirë është themeli i një demokracie funksionale dhe Twitter është sheshi dixhital i qytetit ku debatohen çështje jetike për të ardhmen e njerëzimit," tha Musk në një deklaratë të postuar në Twitter. “Twitter ka potencial të jashtëzakonshëm – mezi pres të punoj me kompaninë dhe përdoruesit për ta zhbllokuar atë”, shtoi ai.
Twitter ka 217 milionë përdorues aktivë çdo ditë. "Pasi të mbyllet marrëveshja, ne nuk e dimë se në cilin drejtim do të shkojë platforma," tha drejtori ekzektiv i Twitter, Parag Agrawal. Musk do t'i bashkohet stafit të Twitter për një seancë pyetje-përgjigje në një datë të mëvonshme, u tha kompania punonjësve.
Elon Musk ka sinjalizuar se Twitter duhet të transformohet si kompani private në mënyrë që të krijojë besim me përdoruesit dhe të bëjë më mirë në shërbim të asaj që ai e quan “fjalë e lirë”. “Shpresoj që edhe kritikët e mi më të këqij të qëndrojnë në Twitter, sepse kjo është ajo që do të thotë liria e fjalës,” shkroi ai.
Musk ka thënë se do të lehtësojë disa kufizime për përmbajtjen në Twitter, do të bllokojë llogaritë e rreme dhe ato të automatizuara dhe do të largojë modelin e të bërit të ardhura bazuar te reklamat.
Se si do të shndërrohet Twitter në drejtimin e Elon Musk mbetet për t’u parë. Njerëzit duket se janë ndarë në dy pjesë: disa mezi po presin, ndërsa të tjerë e shohin me shumë skepticizëm.
