Jin, Jimin, V, RM, J-Hope, Suga dhe Jungkook, shtatë anëtarët e fenomenit të K-pop, BTS, mund të ndërrojnë veshjet skenike për uniforma ushtarake.
Më pak se tre javë përpara se presidenti i ri i Koresë së Jugut, Yoon Suk-yeol, të marrë detyrën, vendi është përfshirë nga një debat nëse dikush duhet të përjashtohet nga shërbimi i detyrueshëm kombëtar – që prej kohësh shihet si një përgatitje thelbësore për një konflikt të mundshëm me fqinjin e paqëndrueshëm, Korenë e Veriut.
Grupi fitues i shumë çmimeve – i cili ka shitur më shumë se 30 milionë albume në mbarë botën dhe ka marrë dy nominime për Grammy – kanë qenë në qendër të spekulimeve për t’u përjashtuar nga programi ushtarak që nga viti 2020, kur u bënë grupi i parë K-pop që arriti në vendin e parë në playlistat amerikane, me këngën e tyre “Dynamite”.
Koreja e Jugut kërkon që të gjithë burrat e aftë fizikisht dhe mendërisht të moshës 18 deri në 28 vjeç të shërbejnë në ushtri për të paktën 18 muaj, për të mbrojtur vendin nga kërcënimet nga Koreja e Veriut, e cila kohët e fundit rifilloi testimin e raketave balistike me rreze të gjatë. Sipas ligjit aktual, vetëm fituesit e Lojërave Olimpike dhe Aziatike dhe muzikantët klasikë të vlerësuar globalisht, përjashtohen ose lejohen të kryejnë shërbime publike alternative.
Vetëm BTS vlen më shumë se 3.54 miliardë dollarë në vit për ekonominë e Koresë së Jugut, sipas një raporti të vitit 2018 nga Instituti i Kërkimeve Hyundai – shifër e barabartë me kontributin e dhënë nga 26 kompani të mesme. Instituti tha se grupi ishte arsyeja që 800,000 turistë të huaj kishin vizituar vendin vitin e kaluar.
Sondazhet tregojnë se shumica e koreano-jugorëve mbështesin një alternativë ndaj shërbimit të detyrueshëm ushtarak për BTS, por megjithatë disa shprehën shqetësimin se, pa udhëzime të qarta, një ndryshim në ligj mund të shfrytëzohet nga njerëz të tjerë.
