Bota e Rochelle Pitts u shkatërrua kur burri i saj prej 13 vitesh, Jesse, ndërroi jetë si pasojë e një aksidenti tragjik me makinë tri ditë para Krishtlindjeve në vitin 2020 - duke e lënë atë gjashtë muajshe shtatzënë me fëmijën e katërt të tyre si edhe me gjithë përgjegjësitë për t’u kujdesur për tre të tjerët.

Pas lindjes së fëmijës, Rochelle priste që ajo të rriste vetëm fëmijët dhe të mos kishte kurrë një shans të dytë në dashuri. “Pasi vdiq burri im, nuk doja të isha më kurrë me dikë,” tha ajo për Jam Press. "Unë gjithashtu kisha katër fëmijë dhe isha vetëm, kështu që si mund të filloja të dilja me dikë?"

Megjithatë, një burim ngushëllimi ishte miku më i mirë i burrit të saj të ndjerë, Scott, me të cilin Rochelle filloi kishte miqësi rreth gjashtë muaj pas vdekjes së bashkëshortit.

Pikërisht atëherë ajo kuptoi se ata kishin shumë tipare të ngjashme. Nuk kaloi shumë kohë dhe miqësia platonike filloi të ndryshojë, megjithëse ajo kishte shqetësime.

“Kisha frikë të dilja me të, një arsye kryesore ishte se e dija që askush nuk do të na kuptonte,” tha Rochelle. “Filloi ngadalë. Ne shihnim filma së bashku dhe ai më ndihmonte në oborr ose me gjëra të rastësishme në shtëpi.”

“Ai ka shtatë vëllezër e motra; ai e kupton ndjenjën e hidhërimit për shkak të përvojave me vdekjen në familjen e tij dhe ai kujdeset për fëmijët e mi,” tha Rochelle për Jam Press. "Hidhërimi ynë nuk e largon atë."

"Menjëherë pasi ai vdiq, jeta ishte jashtëzakonisht kaotike - ne të gjithë qanim vazhdimisht," tha Rochelle.

Në momentin e aksidentit, Rochelle ishte gjashtë muajshe shtatzënë me vajzën e saj më të vogël, Wren, për të cilën ajo tha se është kopje e të atit. Lindja ishte veçanërisht e vështirë pasi foshnja erdhi në jetë vetëm disa javë pas vdekjes së Jesse.

"Ka kaluar rreth një vit e gjysmë që kur ai vdiq," tha ajo. "Ende dhemb çdo ditë, por tani është ndryshe."

Ajo shpjegoi se Scott ka respektuar nevojat e saj, duke e ditur se ajo dhe burri i saj i ndjerë janë njohur në adoleshencë, teksa të dy punonin në një restorant.

“Ai gjithashtu nderon kujtimin e Jesse-it; kur për herë të parë hëngrëm një darkë së bashku, ai u ul në një karrige të veçantë dhe e la karrigen e zakonshme të Jesse-it bosh,” tha ajo për gjestin e Scott. "Ai ende e bën këtë."

Rochelle, e cila tani po studion për t’u bërë avokate, tha se është e rëndësishme që ajo ta tregojë historinë e saj publikisht. Prandaj ajo hapi një llogari tashmë virale të TikTok, si dhe një faqe interneti, “Untitled Grief of a Young Widow”.

“Para se të isha e ve, mund të isha cuditur nëse do të shihja një të ve që dilte me mikun më të mirë të burrit të saj pas vdekjes së tij,” tha ajo. "Por tani që jam e ve, e kuptoj se kjo është shumë normale."