Për vite me radhë, studentët në Tokio duhet të zbatonin disa rregullore të rrepta në lidhje me kodin e veshjes. Por këto rregulla, të kritikuara vazhdimisht, tani do të shfuqizohen.

Sipas kodit të veshjes të sistemit të shkollave publike, të gjithë nxënësit duhej t'i lyenin flokët në ngjyrë të zezë, të brendshmet duhet të kishin një ngjyrë të caktuar si edhe nuk u lejohej të mbanin modele të caktuara flokësh.

Autoritetet në Tokio njoftuan se do të hiqen 5 rregulla nga gati 200 shkolla publike në kryeqytetin japonez, duke përfshirë rregullin për ngjyrën e flokëve dhe të brendshmeve, rregullin që ndallon prerjen e flokëve të gjata sipër dhe të shkurtra në pjesën e pasme dhe anash, një model ky tepër i njohur në mbarë botën, raporton CNN.

Rregulla të tjera që pritet të hiqen përfshijnë praktikën e ndëshkimit të studentëve me një formë arresti shtëpie. Vendimi u mor pasi një sondazh i kryer vitin e kaluar në 240 shkolla në kryeqytet zbuloi se 216 kishin rregullore që një numër në rritje i njerëzve - përfshirë vetë nxënësit - thonë se janë të vjetruara.

Disa shkolla u kanë kërkuar nxënësve që të veshin kanotierë në ngjyrë bezhë, kafe të lehë ose ngjyra të tjera që nuk duken nën uniformat e tyre, ndërsa lejoheshin vetëm të brendshmet e bardha, gri, blu ose të zeza.

"Japonezët janë mësuar të besojnë se është një virtyt që thjesht t'i përmbahen rregullave," tha për Guardian Kaori Yamaguchi, një anëtare e bordit të arsimit në Tokio. “Shpresoj se kjo do të jetë një mundësi për njerëzit që të diskutojnë se çfarë duhet të bëjmë për të krijuar një shoqëri ku rregullat respektohen në një mënyrë që është e pranueshme për të gjithë.”

Çështja e kodit të veshjes u vu në qendër të vëmendjes në vitin 2017 kur një nxënëse e shkollës së mesme në prefekturën e Osakës paditi shkollën duke pretenduar ishte detyruar t'i lyente flokët në ngjyrë të zezë. Ajo u shpreh se e detyronin që t’i lyente flokët shpesh pasi dilte rrënja natyrale kafe. Për shkak të lyerjeve të shpeshta, ajo pësoi dëmtim të skalpit dhe shqetësim mendor.

Shumë studentë kanë ndërmarrë fushata të suksesshme që u kanë lejuar vajzave të veshin pantallona në shkollë, ndërsa të tjerë kanë kërkuar që të lejohet përdorimi i produkteve kozmetike dhe produkteve për flokët.