Një bluzë e veshur nga Arjola Demiri – ku shkruhet “Liria ka emër” dhe nderon Ushtrinë Çlirimtare të Kosovës (UÇK) – është vendosur në qendër të disa komenteve në faqen e Instagramit të “Big Brother VIP”.

“Ne në Kosovë kemi vënë re se sa herë është në nominim Arjola, ajo e vesh bluzën me mbishkrimin ‘Liria ka emër, UÇK’. D.m.th nuk është etike të përdoret apo të keqpërdoret ai shkrim sa herë je ngusht (në nominim)” shkroi dikush në Instagramin e Olti Currit. Në video të publikuara nga “Big Brother VIP” në Instagram, jo pak njerëz shkruajnë të njëjtën gjë.

Arjola ka jetuar dhe punuar në Kosovë dhe është shprehur se ka një lidhje të ngushtë me vendin, mirëpo referuar komenteve, ajo vesh bluzën për të siguruar mbështetjen e shqiptarëve të Kosovës.

Përmes një reagimi në Instagramin e aktores, i cili përdoret nga menaxheri i rrjeteve të saj sociale dhe e motra, hidhen poshtë pretendimet për shfrytëzim të mbishkrimit të UÇK-së.

“Stop përdorimit të nacionalizmit të rremë në dëm të saj. Në një rast të tillë, nacionalizmi është streha e fundit e maskarenjve. Kosovën e ka dashur që ditën kur lindi kur ende s’e dinte fatin e vet,” shkruhet në Instagramin e aktores. “Në profilin e saj në bio nuk ka ekzistuar formati BBV kur ka qenë flamuri i Kosovës aty.”