Debati i ashpër mes Einxhel Shkirës dhe Donald Veshajt të “Big Brother VIP” është për momentin një nga diskutimet më të përmendur në rrjete sociale, i cili ka përfshirë edhe njerëz të tretë, familjarë, miq dhe ish-bashkëpunëtorë të tyre.
Nëse nuk e keni ndjekur ose keni nevojë për një rifreskim për akuzat e pavërtetuara ndaj njëri-tjetrit, të martën, Einxhel dhe Donald u përfshinë në një zënkë të ashpër. Donaldi nuk e priti mirë transmetimin e një klipi ku Einxhel shprehej se ai dhe i vëllai, Romeo, u bënë të famshëm nga të dashurat që kishin asokohe, përkatësisht Bora Zemani dhe Jonida Maliqi. Donaldi la të nënkuptuar se kishte njohuri për detaje të jetës së Einxhel, të cilat nëse i bënte publike mund të rrezikonin lojën e saj.
Kjo e fundit, theksoi se nuk ka asgjë për të pasur frikë dhe gjatë toneve të ashpra deklaroi se ai dhe Romeo e kanë hequr nga puna sepse nuk u paraqit, ndërkohë që sipas Einxhel ajo kishte bërë aksident me makinë. Einxhel deklaroi gjithashtu se binjakët nuk e kanë paguar, ndonëse ajo ka qenë korrekte. Nga ana tjetër, Donaldi hodhi poshtë akuzat dhe u shpreh se shkak i pushimit nga puna ka qenë sjellja jokorrekte e Einxhel, e cila sipas tij ka ndodhur edhe në marrëdhënie të mëparshme pune në televizione të tjera. Shtojmë gjithashtu se Einxhel u shpreh se binjakët Veshaj nuk kanë paguar as aktoren Mariana Kondi, e cila ishte pjesë e “Binjakët Show”.
Pas debatit në “Big Brother VIP”, Kondi postoi në Instagram vetëm “pa fjalë!” duke e lënë të paqartë se për cilën pjesë është pa fjalë.
I ati i Einxhel, Muzafer Shkira, në Instagram shkruan:
“Lidhur me komentet shumë të njëanshme jashtë debateve në BBV midis Einxhelit dhe banorit Donald, në lidhje me largimin nga puna apo moskorrektesën e Einxhelit, do doja të dija:
1. Kontratën e punës të firmosur nga të dyja palët me të gjitha kushtet që ajo përmban për rolin e saj në spektaklin e pretenduar dhe hapësirën e saj në ekranin e Vizion Plus TV. Oraret, kërkesat dhe detyrimet e të dyja palëve. Kjo e vulosur tek noteri. Si dhe pagën e punës së saj për aq kohë sa mendohej kohëzgjatja.
2. Dua të më tregojnë borderonë e financës ku i është dhënë rroga Einxhelit, të firmosur nga vetë ajo.
3. Kërkoj nga subjekti apo produksioni i këtij spektakli apo zyra e personelit motivacionin zyrtar të largimit nga puna, të firmosur nga të dyja palët. Përpara se këtë ta kërkoj nga institucionet financiare shtetërore që merren me këto punë.”
Z.Muzafer shton se “debatet banale dhe pa vlerë të bëra në audiencën e BBV nuk mendoj se janë më të ashpra sesa një situatë e përsëritur nga këto subjekte në lidhje me produksionet e tyre. Korrektësia në punë gjithmonë është zyrtare dhe me kushte, aspak shoqërore dhe kafeneve”. Ai thotë se sipas tij “binjakët kanë premtuar të tjera gjëra për angazhimin e Einxhelit”.
Në emisionin “Shqipëria Live”, mikesha e Einxhelit dhe e pranishme me të në aksidentin e pretenduar pohoi se deklarata e Einxhelit është e vërtetë.
View this post on Instagram
Në një postim në Instagram, regjisori i emisionit “Binjakët Show” shkroi:
“Për sa i përket debatit të mbrëmshëm midis Donaldit dhe Einxhel në Big Brother Albania VIP, ndjej detyrimin të mbaj një qëndrim për të mirën e asaj që jo gjithë çfarë thuhet duhet përtypur. Einxhel nuk ka qenë korrekte me oraret. Kjo ishte arsyeja e shkëputjes së bashkëpunimit.”
Gjatë një bisede me Arjolën në shtëpi, Einxhel u shpreh ndër të tjera, “Edhe nga puna që përmendi ai te Ora, nuk kam ikur. Filloi Covidi, karantina dhe nuk më dhanë asnjë lekë, asnjë qindarkë, as gjysmë rroge, as çerek, asnjë gjë.” Në një reagim zyrtar, RTV Ora njofton se Einxhel nuk ka qenë kurrë pjesë e televizionit.
“[...]Deklarata se marrëdhëniet e punës me të u shkëputën në pandemi nuk qëndrojnë aspak dhe kjo për faktin se Shkira nuk ka qenë në asnjë moment e angazhuar në televizionin RTV Ora. Ndoshta pa dashur Shkira mund të ketë dashur të përmendë ndonjë televizion tjetër, apo mund të ketë qenë e ftuar në emisione, por aspak në moderim, gazetare, asistente, teknike apo pjesë e stafit të rubrikave të tjera në RTV Ora. Me keqardhje për këtë deklaratë, por jemi të detyruar të bëjmë këtë sqarim kur Shkira deklaron se nuk është paguar për punën e bërë, pasi nuk ka bërë në fakt në RTV Ora asnjë punë.”
