Aq të përfshirë janë Elvana Gjata dhe Mozzik me boksin në klipin e këngës së tyre më të re, “Ska” – një zgjedhje simbolike për të përcjellë luftën me veten dhe të tjerët – sa është e pamundur që të mos përfshihesh nga dëshira për të vendosur dorezat dhe grushtuar thesin e famshëm të boksit. Te ky i fundit do të ndalemi më gjerësisht në vijim. Arsyet goxha bindëse me gjasë do t’ju bëjnë ta mendoni seriozisht që ta nisni si aktivitet fizik (ndonëse nuk synoni të merrni medalje ari).
Ju kujtohet Adele më parë? Në një intervistë të mëparshme me Vogue, këngëtarja u shpreh se nisi të stërvitej për të menaxhuar mirëqenien e saj të përgjithshme dhe, përveç të tjerash, boksi përfshihet në rutinën e stërvitjes. Adele tha se stërvitet “dy ose tre herë në ditë” dhe bën boks paradite.
Ellie Goulding ka pasur probleme me sulmet e panikut dhe në një intervistë për Standard në vitin 2020 tha se fitnesi, veçanërisht boksi, e kanë ndihmuar të kapërcejë problemet me shëndetin mendor. Ajo theksoi se është në një gjendje paqeje dhe ia ka dalë ta përballojë ankthin me sukses.
Princ Harry gjithashtu menaxhoi ankthin përmes boksit. Harry ka pohuar publikisht se pas vdekjes së të ëmës ka përjetuar dy vite kaosi aq të vështira, sa nuk mundi t’i kalonte i vetëm. Ngjarja e rëndë i shkaktoi një ankth të vazhdueshëm dhe se për të çliruar agresivitetin, iu desh të niste boksin.
Ushtrimet e boksit janë disa prej ushtrimeve që praktikohen vazhdimisht nga yjet e Victoria’s Secret. "E dua trupin tim prej atleteje kur isha 17 vjeç dhe e dua trupin tim tani. Po, kam humbur ca "shëndet fëmijërie", por në të vërtetë, është thjesht muskulatura që kisha krijuar nga basketbolli që është kthyer në muskuj më të ngjeshur nga boksi, dhe stresi i punës që ndikon, por nuk e kam pasur ndonjëherë për qëllim ta ndryshoj fizikun tim", iu përgjigj Gigi një komentueseje në dhjetor të 2016-s.
Në janar të vitit 2017, modelja Taylor Hill u shreh se regjimi i sportit është shumë intensiv, sidomos përpara sfilatave.
Sipas Healthline, sporti i boksit ndihmon në qarkullimin e gjakut, lehtëson dhimbjet në zonën e mesit, vitheve dhe këmbëve dhe vë në lëvizje gjithë muskujt e trupit.
Nisur nga fakti që ndërtohet mbi bazën e disa lëvizjeve të koordinuara me rrahjet e zemrës dhe frymëmarrjen, ky sport ka efekte pozitive për trupin, lëkurën dhe mendjen, sepse tonifikon, përmirëson humorin, pakëson ankthin dhe stresin, çliron energjitë negative dhe rrit vetëbesimin.
