Dosja spam në email – dosja me komunikimet e padëshiruara – mund të mos jetë dhe aq e padëshiruar.

Laura Spears nga Oakland County, Michigan, mund ta vërtetojë këtë, pasi së fundmi zbuloi një çmim llotarie prej 3 milionë dollarësh.

Fituesja me fat kishte blerë një biletë Mega Millions në faqen e Lotarisë së Michigan-it për shortin e 31 dhjetorit. Ajo krahasoi pesë numra për të fituar 1 milion dollarë dhe gjithashtu kishte mundësinë që ta shumëfishonte çmimin e saj në tre.

“Pashë një reklamë në Facebook se jackpoti i Mega Millions po bëhej mjaft i lartë, kështu që hyra në llogarinë time dhe bleva një biletë,” u tha Spears, 55 vjeç, zyrtarëve të Lotarisë së Michigan-it. "Disa ditë më vonë, po kërkoja një email që më mungonte, kështu që kontrollova dosjen e spam-it."

"Pashë një email nga lotaria që thoshte se kisha fituar një çmim. Nuk mund ta besoja atë që po lexoja, kështu që u futa në llogarinë time të lotarisë për të konfirmuar mesazhin në email. Kam fituar vërtet 3 milionë dollarë!"

Spears, e cila mori çmimin javën e kaluar, tha se po planifikon të ndajë fitimet me familjen dhe të dalë në pension herët.

Ju me gjasë nuk do të fitoni 3 milionë dollarë, madje me shumë mundësi mund të mos fitoni fare para, megjithatë duhet t’i hidhni një sy herë pas here edhe emaileve te dosja spam sepse nuk dihet se kush mund t’ju ketë shkruar.

Zakonisht në spam vendosen emailet që janë të pakërkuara, të rrezikshme (për viruse ose vjedhje të dhënash), emaile të përsëritura etj. Por nuk përjashtohet mundësia që të gjeni ndonjë email të rëndësishëm i cili mund të jetë cilësuar si i pakërkuar në mungesë të një komunikimi të mëparshëm.