Shefi i NATO-s paralajmëron se vendet duhet të përgatiten "për një luftë të gjatë"
Jens Stoltenberg ka paralajmëruar se nuk do të ketë një fund të shpejtë të luftës në Ukrainë, në një intervistë të botuar të dielën, ndërsa Kievi vazhdon me kundërsulmin e tij kundër Rusisë, raporton Agence France-Presse.
“Shumica e luftërave zgjasin më shumë se sa pritej kur fillojnë,” tha Stoltenberg në një intervistë me grupin mediatik gjerman Funke. "Prandaj ne duhet të përgatitemi për një luftë të gjatë në Ukrainë."
“Ne të gjithë dëshirojmë një paqe të shpejtë,” tha Stoltenberg. “Por në të njëjtën kohë ne duhet të pranojmë: nëse presidenti [Volodymyr] Zelenskiy dhe ukrainasit ndalojnë së luftuari, vendi i tyre nuk do të ekzistojë më. Nëse presidenti Putin dhe Rusia heqin armët, ne do të kemi paqe”.
Kryeministrja italiane deklaron se migracioni është një problem për të gjithë Europën
Kryeministrja e Italisë ka thënë se vendet europiane duhet të punojnë së bashku "për të ndalur largimet [nga Afrika]" dhe për të deportuar me shpejtësi ata që nuk janë pranuar për azil, për të cilët ajo tha se "kërcënojnë të ardhmen e Europës", pasi mijëra njerëz që kërkonin strehim mbërritën në Lampedusa javët e fundit.
Giorgia Meloni vizitoi ishullin e vogël siçilian, i cili për vite ka qenë porti i parë për njerëzit që vijnë nga deti nga Afrika e Veriut, të dielën në mëngjes së bashku me Ursula von der Leyen, presidenten e Komisionit Europian.
Vizita tre-orëshe vjen pasi pothuajse 8,500 njerëz zbritën brenda tre ditëve javën e kaluar – më shumë se popullsia e ishullit prej 6,000 banorë. Trupi i një foshnjeje që vdiq pak pasi lindi në një varkë me 40 pasagjerë u vendos në një arkivol të bardhë dhe u dërgua në varrezat e ishullit.
Cmimi i naftës drejt rritjes
Çmimet e naftës mund të arrijnë në 100 dollarë për fuçi këtë muaj për herë të parë gjatë vitit 2023, pasi u rritën me pothuajse 30% që nga qershori, pas shkurtimeve të prodhimit rus dhe Arabisë Saudite dhe rritjes së kërkesës nga Kina.
Nafta e papërpunuar Brent, pikë referimi e çmimit të naftës, u rrit në nivelin më të lartë në 10 muaj javën e kaluar me pothuajse 94 dollarë për fuçi, nga 72 dollarë për fuçi në qershor – duke shkuar drejt rritjes më të madhe tremujore që nga pushtimi i Ukrainës.
Nafta e papërpunuar amerikane, West Texas Intermediate, është rritur nga 67 dollarë për fuçi në 90 dollarë për fuçi gjatë së njëjtës periudhë.
Pronarja e çerdhes në New York akuzohet për vrasje pas vdekjes së foshnjës nga mbidoza
Një pronare e një çerdheje në Bronx, e identifikuar si Grei Mendez, u burgos me akuzë për vrasje nga pakujdesia, si dhe akuza për drogë të shtunën, pasi një foshnjë njëvjeçare vdiq nga helmimi me fentanil.
Tre fëmijë të tjerë – një vajzë tetë muajshe dhe dy djem dyvjeçarë – gjithashtu dukej se ishin sëmurë nga opioidi sintetik i fuqishëm, thanë autoritetet.
Policia ende nuk ka bërë të ditur se si fëmijët kanë rënë në kontakt me drogat. Mendez u arrestua së bashku me një person tjetër.
