Ministrja e Arsimit, Evis Kushi, njoftoi se javën e ardhshme shkollat do të mbyllen për 3 ditë për shkak të temperaturave "të jashtëzakonshme për një vend si i yni".
“Sipas parashikimeve meteorologjike, në ditët në vijim priten temperatura tepër të ulëta, të cilat janë temperatura të jashtëzakonshme për një vend si i yni. Madje në disa zona do të arrijë deri në -17 gradë celsius.
Për këtë arsye, duke qenë se prioriteti ynë absolut në çdo kohë është shëndeti dhe mirëqenia e fëmijëve tanë, kemi vendosur që shkollat të mbyllen javën e ardhshme, nga dita e hënë deri të mërkurën, dhe orët e humbura do të zëvendësohen në vijim pas një njoftimi të dytë në bashkëpunim me zyrat vendore arsimore.”
Ministrja njoftoi se nëse parashikimet nuk do të dalin të sakta dhe temperaturat do të jenë më të pranueshme, vendimi do të rishikohet.
