3 muaj pas ndarjes nga jeta të Hueyda El Saied, bashkëshorti i saj, Thierry Grosjean foli për jetën pa të gjatë një interviste mëngjesin e sotëm në "Wake Up". I pyetur në lidhje me vendimin e saj për ta mbajtur sëmundjen sekret, ai u përgjigj:

"Ka një arsye dhe arsyeja kryesore ishte gjendja e saj emocionale. Ajo s'donte që njerëzit të ndjenin keqardhje për të. Ishte shumë e rëndësishme të qëndronte e përqëndruar në ndryshimet që po pësonte dhe në procesin e rikuperimit. Duhet të ishte e përqëndruar në luftën e kësaj sëmundjeje. Kjo ishte arsyeja pse ajo e mbajti sekret vetëm me ne dhe rrethin e ngushtë familjar."

Hueyda u nda nga jeta si pasojë e kancerit të gjirit në fazë të zhvilluar, por përgjatë 18 muajve luftë, Thierry tregon se u shndërrua në krenari për të gjithë ata që ishin pranë saj.

"S'ka qenë fare e thjeshtë, po në fillim isha aty kur mora njoftimin. Ishte shok për ne. Disa orë pasi mori njoftimin tha "ok, është një lajm i tmerrshëm, por duket të përballem". Më tha se do të luftonte për veten, për Gabrielin dhe për mua. E gjeti fuqinë dhe përqëndrimin që pas disa minutash dhe i habiti të gjithë me guximin dhe forcën që tregoi. Mjekët, infermierët dhe të gjtihë ne ishim shumë krenarë për gjithë rrugëtimin." 

Bashkëshorti i El Saied tha se vendimi që Hueyda të prehej në Luksemburg ishte i tij. 

"Ishte vendimi im që ajo të prehej këtu, pas miratimit të familjes së saj sigurisht. Ishte vendimi dhe përgjegjësia ime. Siç e kam thënë edhe më herët, dua ta mbaj Hueyda-n pranë vetes dhe Gabrielit, është shumë e rëndësishme ta kemi pranë. Unë e vizitoj çdo ditë." 

Përsa i përket jetës së re me Gabriel, Thierry tha se është një aventurë shumë e bukur dhe një përgjegjësi që i jep shumë kënaqësi. 

"Eshtë kënaqësi ta shoh tim bir çdo ditë dhe ta rris atë. Ai gjatë gjithë atyre muajve të vështirë e dinte çfarë po ndodhte. E dinte që nëna e tij mund të largohej nga jeta. Ishte e vështirë, por Gabrieli është i fortë, duke e krahasuar me situatën ku ndodhet. Ne flasim çdo ditë për Hueyda-n. Kam miliarda gjëra që do të doja të bëja me të. S'kam asnjë peng pasi mendoj që edhe kjo periudhë, këto 18 muaj ishin të bukur për dashurinë tonë. U dashuruam edhe më fort, ishte një tragjedi sepse ajo s'është më tani, por s'jua shpjegoj dot si e kam përjetuar. Nuk kam pengje, ajo është në zemrën time dhe të Gabrielit çdo sekondë."- përfundoi ai.

Hueyda El Saied u nda nga jeta në moshën 46-vjeçare në 23 nëntor.