Po këtë herë çfarë ndodhi? Travis Barker mund të ketë zbuluar padashje se Kylie Jenner dhe Travis Scott janë bërë sërish prindër.
Dhe Travis Barker është...? I fejuari i Kourtney Kardashian, motra e Kylie-t.
Kuptoj. Vazhdo. Po thoja që gjatë festimeve të Krishtlindjes, i fejuari i Kourtney-t postoi këtë foto duke parë filmin klasik të festave të fundvitit, “How the Grinch Stole Christmas”.
E ç’ka këtu. Duket një foto normale. Për ty, por jo për ndjekësit syshqiponjë.
Jo për njerëzit që nuk kanë me çfarë merren doje të thoje? Mos paragjyko.
Tërhiqem. Ku është problemi me foton. Në cep duket një shishe për bebet.
Dhe?! Mund të jetë lodër për fëmijët. Dhe do ta mbushnin me lëng? Duket si qumësht.
Po ku di unë, e kanë për macen. Nuk është shishe për macet, përdoret për fëmijët.
Dëgjo, duket sikur Kardashian-Jenner kanë mbi 500 nipër e mbesa. Mund ta ketë kushdo. E menduam edhe këtë, por pasi analizuam produktin, është për bebe 0-3 muajsh.
Po pra, për ndonjë nga nipërit a mbesat e familjes. Por asnjë nuk është nën 3 muajsh.
Oh, heq dorë. Ju vërtet keni shumë kohë për t’u marrë me këto gjëra të panevojshme. Kemi po aq kohë sa ti që lexove deri në fund të artikullit.
