Foto: Ergys Zhabjaku

Nga personazhi në $NOB, personazhi i preferuar e deri te pasionet e tjera, Altea Lazaj iu përgjigj disa prej pyetjeve të ndjekësve në Instagramin e @snob_tvseries.

Në $NOB, Altea luan rolin e Sarës, një vajze që ka ëndrra shumë të thjeshta: Ajo do të bëhet fashion designer dhe të bëjë krenarë prindërit e saj emigrantë në Greqi. E ardhur në Tiranë nga Patosi, Sara ishte e lumtur në botën e saj të vogël artistike ku i mjaftonin vetëm letrat, lapsat dhe një makinë qepëse. Por fati e përplas me botën e milionerëve, arrogancën e njerëzve që mendojnë se janë më lart se ajo dhe paragjykimet. Dilema e Sarës është të ndjekë zemrën apo të qëndrojë siç ishte?

Jo më kot, Altea e përshkruan Sarën me pak fjalë si “naive, të sinqertë dhe shumë romantike. Sara është shumë e dhënë pas dashurisë”. Ajo tregoi gjithashtu se ka patur momente ku ka qenë më shumë e përfshirë te personazhi. “Është skena tek stalla e kuajve, ku unë zihem dhe debatoj me Tesën. Kam qenë aq shumë e përfshirë, sikur po më ndodhte mua në të vërtetë. Kam kuptuar që isha në një skenë xhirimi vetëm kur regjisori tha ‘cut’,” u shpreh Altea.

E pyetur për vështirësinë për të qenë në këpucët e një personazhi dhe si e sheh veten tani, aktorja tha:

“Nuk ishte shumë e vështirë të isha Sara, pasi unë dhe Sara ngjasojmë me njëra-tjetrën. Përveç kësaj ne kemi bërë një punë kolosale që të arrinim rezultatin e synuar dhe shpresoj t’ia kemi dalë. Tani që e shoh serialin mendoj që e gjithë puna e lodhshme që kemi bërë ia ka vlejtur. Vlen të theksoj se ndihem shumë krenare për veten, për kastin dhe për produksionin.”

Përpos rolit në $NOB, aktorja u pyet për eksperiencat e tjera në aktrim dhe përtej aktrimit. “Kam mbaruar për regji teatri dhe kemi realizuar shumë shfaqje në shkollë, por kam marrë pjesë edhe në filma të tjerë. Gjithashtu kam qenë aktore tek shfaqja e teatrit “Xhelatët”. Edhe pse kam studiuar për regji teatri nuk mendoj se do ta ushtroj ndonjëherë si profesion, pasi pasioni im më i madh është aktrimi,” tha ajo.

Ndërsa përsa u përket pasioneve të tjera përmendi se është marrë 10 vjet me kërcim, ka dëshirë të bëj rap dhe në kohën e lirë del me patina.

Karakteri i preferuar në $NOB është Paulini. “Mendoj që është një personazh mjaft interesant dhe për më të tepër ai thotë shprehje shumë të goditura që mund t’i konsiderosh si këshilla për jetën,” shtoi ajo.

Ku e sheh veten Altea pas 10 vitesh? “Pse jo në sezonin e dhjetë të $NOB në Netflix,” përfundoi aktorja.

Për të tjera intervista pyetje-përgjigje me ndjekësit në rrjete sociale, klikoni mbi emrat përkatës: Ketjona Pecnikaj (Tesa), Gent Disha (Albani), Olta Beqiri (Kristela), Megli Haskaj (Xhesika), Brarend Akçiu (Bojken), Elios Shuli (Joan).