Asgjë nuk mund ta shpëtojë martesën e Kim Kardashian dhe Kanye West, përfshirë këtu edhe lutjet publike të reperit.

Në dokumentet e fundit të paraqitura në gjykatë, të siguruara nga Page Six, Kim deklaroi se asnjë përpjekje për këshillim apo pajtim nuk do të jetë në gjendje të shpëtojë martesën e saj me Kanye West.

“Kanë ekzistuar dhe vazhdojnë të ekzistojnë dallime të papajtueshme midis nesh, të cilat kanë bërë që martesa jonë të prishet në mënyrë të pakthyeshme,” tha Kardashian. “Asnjë përpjekje për këshillim apo pajtim nuk do të ketë asnjë vlerë në këtë moment.”

Ajo shtoi, “[West] dhe unë të dy meritojmë mundësinë për të ndërtuar jetë të reja. Prandaj, kërkoj që kërkesa ime për ndarje dhe përfundimin e statusit tonë martesor të plotësohet.”

Kim pohon gjithashtu se martesa me Kanye-n "nuk është më e qëndrueshme" dhe kërkoi nga gjykata që të jetë ligjërisht beqare, ndërkohë që ajo dhe reperi do të zgjidhin çështjen e kujdestarisë së fëmijëve.

Page Six raporton se Kim i dorëzoi dokumentet sepse ishte turpëruar nga veprimet e fundit të Kanye, i cili gjatë një koncerti i kërkoi publikisht Kim-it që të rikthehej në shtëpi.

“Kim mendon se është e çuditshme që Kanye vazhdon të thotë se dëshiron që ajo të kthehet, por gjatë gjithë kohës e ka ende modelen [22-vjeçare] në shtëpinë e tij në Malibu”.

Në nëntor u përfol se West është në një lidhje me modelen Vinetria. Ndërkohë mendohet se Kim Kardashian po nis një marrëdhënie me Pete Davidson.