Aktorja e njohur shqiptare, Edi Luarasi ka ndërruar jetë në moshën 81-vjeçare si pasojë e një sëmundjeje të rëndë. Ka qenë djali i saj i cili përmes një postimi në Facebook ka njoftuar mbi lajmin e rëndë. Aktorja la pas një trashëgimi të pasur në teatër, vend të cilin e përqafoi në moshë fare të re.
Luarasi u diplomua për aktrim në 1963, për t'u emëruar më pas si aktore në Teatrin Popullor. Roli i parë i saj ishte Vera në dramën “Shtëpia në bulevard” më 1963 me regjisor Kujtim Spahivoglin.
Gjatë 10 viteve në vijim, vijnë një sërë rolesh të arrirë, ku veçojmë Lenën tek “Doktor Aleksi”, Kordelja tek “Mbreti Lir”, Cuca tek “Cuca e maleve”, Kristina tek “Fytyra e dytë”, etj. Edi Luarasi u përjashtua nga Teatri Kombëtar në 22 janar 1974 për arsye politike e më pas u rikthye në skenë në mars 1991, ku interpretoi rolin e damës plakë, në dramën: “Vizita e Damës plakë”.
Burimi: Euronews
