Në episodin e katërt të $NOB morën përgjigje shumë pyetje të ngritura gjatë serive të mëparshme, por edhe të tjera enigma dolën në pah.

“Nuk bëra dot asgjë,” i tha Tesa një personazhi misterioz në episodin e kaluar, i cili është i dashuri i saj, Albani. Disa detaje thelbësore zbulohen për personazhin e Albanit në serinë e katërt – një karakter kompleks, i gatshëm t’u futet rrugëve të vështira për t’u pasuruar, por ndonjëherë fati nuk është në anën e tij. Tesa dhe Albani qëndrojnë në një zonë të largët dhe i fshihen dikujt. Nga kush arratisen ata dhe për sa gjatë do t’ia dalin të mos zbulohen?

Fare pak. Djalli punon fort, por njerëzit e Paulinit misterioz punojnë më fort! Bojkeni vendos të surprizojë Sarën, por njerëzit e Paulinit mbërrijnë para tij. Çfarë kërkojnë ata nga Sara?

Përballja e Xhesikës me Kristelën nuk është ajo që shumë prej jush mund të kenë pritur. Xhesika ka të tjera plane në kokë. Hakmarrja është pjatë që serviret e ftohtë.

Tesa dhe Sara bashkohen sërish, këtë herë në një rrugëtim shumë më të rrezikshëm se vizita në vilë. Të rrëmbyera, pas 2 orësh e gjejnë veten në një sallë kuajsh dhe fajin e ka Tesa. Misioni i saj në vilë dështoi. A do t’i japë më shumë kohë Paulini Tesës? Çfarë i lidh ata të dy? Albani dhe jo vetëm.

Problemet e Albanit shkaktojnë tension në marrëdhënien e Tesës me të ëmën, Lilin. Një grua e ve që ka humbur të birin, Lili kërkon vetëm një gjë, të mos humbasë edhe vajzën. Por Tesa nuk heq dorë nga përpjekja për t’i dalë zot Albanit. Deri kur?

Episodi i katërt mbyllet në një mënyrë enigmatike. Paulini, i cili pas shumë përpjekjesh arrin të ketë “në duar” Albanin, i thotë të pastrohet sepse “i pret një ditë e gjatë”.

Seritë e $NOB transmetohen të dielën, ora 20:00 në Top Channel; ritransmetimi të mërkurën, ora 23:30.