Virgil Abloh, drejtori artistik i Louis Vuitton për koleksionin e veshjeve për burra dhe drejtori ekzekutiv i Off-White, u nda nga jeta në moshën 41-vjeçare.
Përmes një deklarate zyrtare, LVMH Moët Hennessy Louis Vuitton njoftoi se Abloh luftonte me kancerin prej vitesh.
“LVMH dhe Off-White janë të trishtuar për të njoftuar vdekjen e Virgil Abloh, të dielën, më 28 nëntor, nga kanceri me të cilin ai luftonte privatisht prej vitesh.”
LVMH, Louis Vuitton and Off White are devastated to announce the passing of Virgil Abloh, on Sunday, November 28th, of cancer, which he had been battling privately for several years. pic.twitter.com/CytwZLvSFu
— LVMH (@LVMH) November 28, 2021
Virgil Abloh ishte dizajner, DJ dhe sipërmarrës amerikan, i cili ka qenë drejtor artistik i koleksionit të veshjeve për burra të Louis Vuitton që nga marsi 2018. Abloh ishte gjithashtu drejtori ekzekutiv i labelit me bazë në Milano, Off-White, një shtëpi mode të cilën themeloi në vitin 2012.
Me përvojë në arkitekturë, Abloh i hyri botës së modës përmes street fashion. Në vitin 2009, ai kreu një praktikë te Fendi së bashku me Kanye West. Pas kësaj ai bashkëpunoi me Kanye dhe nisi themelimin e Off-White.
Virgil Abloh ishte amerikani i parë me origjinë afrikane që ishte drejtor artistik i një shtëpie mode luksoze franceze. Në vitin 2018, ai u cilësua nga revista Time si një nga 100 njerëzit më me ndikim në botë.