Bota

Lajme për dembelët: Çfarë po ndodh në botë

Shkruar nga Anabel

23 Nëntor 2021

Lajme për dembelët: Çfarë po ndodh në botë

"Lajme për dembelët" do të titullohet rubrika më e re në Anabel.al, e cila ka për qëllim të përmbledhë shkurtimisht, çdo mëngjes, disa nga ngjarjet më të rëndësishme dhe aktuale nëpër botë.

Lajme për dembelët: Çfarë po ndodh në botë

Përplasja e autobusit në Bullgari shkakton vdekjen e 46 personave

46 persona kanë ndërruar jetë, shumica prej tyre turistë nga Maqedonia e Veriut, pasi një autobus u përfshi nga flakët në një autostradë në Bullgari të martën, thanë zyrtarët. Mes viktimave pati fëmijë dhe shtatë persona me djegie u dërguan në spitalin e kryeqytetit, Sofje, tha për televizionin BTV kreu i departamentit të sigurisë nga zjarri në ministrinë e brendshme, Nikolai Nikolov.

Ministri i Jashtëm i Maqedonisë së Veriut, Bujar Osmani, u shpreh se autobusi po shkonte në Shkup pas një udhëtimi pushimesh në fundjavë në Stamboll, Turqi.

Lexoni më shumë: Tragjedia në Bullgari: Shumica e viktimave, shqiptarë të Maqedonisë së Veriut; mes tyre edhe fëmijë

Lajme për dembelët: Çfarë po ndodh në botë

Gjermania dhe Holanda përballen me shtrëngim të masave të Covid, ndërsa Austria izolohet

Gjermanëve dhe holandezëve u është thënë se duhet të përballen me kufizime akoma më të ashpra për Covid pasi ministri gjerman i shëndetësisë, Jens Spahn, bëri parashikimin befasues se shumica e bashkatdhetarëve të tij do të "vaksinohen, kurohen ose vdesin" deri në fund të dimrit.

Austria u bë vendi i parë i Europës Perëndimore që rihyri në izolim që nga fillimi i vaksinimit në fillim të këtij viti.

Lajme për dembelët: Çfarë po ndodh në botë

Parada e Krishtlindjeve në Waukesha: Një burrë vret pesë persona dhe plagos mbi 40 të tjerë

Një automjet i kuq kaloi nëpër barrikadat e policisë në një paradë lokale të Krishtlindjeve të dielën pasdite në Waukesha, Wisconsin, duke vrarë pesë persona dhe duke plagosur më shumë se 40, përfshirë fëmijë.

Autoritetet në Wisconsin të hënën identifikuan një burrë 39-vjeçar si personin që futi makinën.

Darrell E Brooks përballet me pesë akuza për vrasje të qëllimshme të shkallës së parë. Dyshohet se ai u përfshi në një konflikt të paspecifikuar në familje para incidentit dhe deri tani nuk ka asnjë provë që ishte një sulm terrorist ose se i dyshuari njihte dikë në paradë.

Lajme për dembelët: Çfarë po ndodh në botë

Gratë ndalohen të shfaqen në filmat televizivë sipas rregullave të talebanëve

Gratë do të ndalohen të shfaqen në drama televizive në Afganistan, sipas kufizimeve të reja mediatike të talebanëve.

Të gjithë filmat, telenovelat dhe shfaqjet argëtuese me gra janë të ndaluara, sipas udhëzimeve të qeverisë. Ministria e Përhapjes së Virtytit dhe Parandalimit të Vesit nxori tetë direktiva në lidhje me çfarë lejohet të transmetohet. Për shembull, gratë që prezantojnë lajmet duhet të mbajnë shami në ekran. Në mënyrë të ngjashme, burrat në ekran duhet të veshin "rroba të duhura", megjithëse udhëzimet nuk specifikojnë se cilat lloje të rrobave konsiderohen "të duhura".

Ministria shtoi se filmat në kundërshtim me ligjin islamik dhe vlerat afgane nuk duhet të transmetohen, as filma të huaj dhe vendas që "promovojnë kulturën dhe vlerat e huaja". Vendimi i fundit tregon se prania e grave në jetën publike në Afganistan është ende e pasigurt.

Lajme për dembelët: Çfarë po ndodh në botë

Vazhdojnë shpërthimet e vullkanit në La Palma; banorët duhet të mbajnë maska për shkak të gazrave të dëmshëm në ajër

Autoritetet në ishullin spanjoll La Palma urdhëruan banorët e tre qyteteve bregdetare të qëndrojnë brenda të hënën pasi një rrymë e re llave u përplas në oqean, duke dërguar re të dendura të gazrave potencialisht toksikë lart në qiell.

Pamjet me dron treguan re të bardha që dilnin nga uji. Banorët në kryeqytetin Santa Cruz janë këshilluar të mbajnë maska për herë të parë që nga fillimi i shpërthimit për shkak të përqendrimeve të larta të grimcave dhe dioksidit të squfurit në ajër.

Sipas programit të monitorimit të fatkeqësive, Copernicus, rrjedhat e llavës kanë dëmtuar ose shkatërruar rreth 2,650 ndërtesa që nga 19 shtatori, duke detyruar evakuimin e mijërave njerëzve.

Lajme për dembelët: Çfarë po ndodh në botë

BE-ja po shqyrton vlefshmërinë e certifikatës së vaksinimit

Komisioni Europian synon të shqyrtojë kohëzgjatjen e vlefshmërisë së certifikatës së vaksinimit të Covid-19, duke përfshirë edhe efektet e vaksinave përforcuese, tha të hënën komisionerja e Shëndetësisë Stella Kyriakides.

"Unë jam plotësisht dakord me urgjencën dhe kjo është arsyeja pse Komisioni Europian po punon me urgjencën më të madhe për të forcuar koordinimin e lëvizjes së lirë, duke përfshirë kohëzgjatjen e vlefshmërisë dhe rolin e dozave shtesë në fushatën e vaksinimit," u tha ajo ligjvënësve europianë në Strasburgu.

Burimet: CNN, Guardian, Reuters

MOS I HUMBISNI