Të gjithë janë të pafajshëm, derisa të provohet e kundërta. Kush është fajtor dhe çfarë ka ndodhur?

Episodi i tretë i $NOB nis me Tesën dhe Francin, ku ky i fundit është i vendosur për të përmbushur qëllimin e tij – të zbulojë arsyen e vërtetë se pse Tesa shkoi në vilë. Ndonëse i ofron para në këmbim të seksit, diçka duket se e bën Francin të dyshojë se Tesa nuk është ajo që shfaqet.

Teksa Tesa largohet në fshehtësi nga vila (pa e ditur se “sy” të tjerë janë duke e vëzhguar), Sara dhe Bojkeni shijojnë qetësinë e natës në shoqërinë e njëri-tjetrit. Pak çaste larg të tjerëve i bëjnë dy të rinjtë të bisedojnë për dashurinë, njohjet e reja, por edhe hendekun që i ndan.

Pak metra larg qetësisë dhe dashurisë së re që po lind mes Bojkenit dhe Sarës, disa po luftojnë me një situatë jetë a vdekje.

E rrëzuar nga Endi, Xhesika gjendet pa ndjenja dhe e gjakosur. Kristela, e penduar që vendosi të ndihmonte Endin, debaton me këtë të fundit mes tensionit që krejt papritur e gjejnë veten në një skenë të mundshme krimi. Fati i Xhesikës nuk dihet. Ka puls, por deri kur?

Sikur të mos mjaftonte kjo, në përpjekje për të fshehur gjurmët, Endi gjuan – këtë herë me dashje – një tjetër person. 

Franci, të cilit i pëlqen të mendojë që di gjithçka, këtë herë nuk di asgjë. Ai kërkon në pyll të dashurën me Kristelën e Endin, pa e ditur se të vërtetën e zhdukjes së Xhesikës e dinë po ata të dy. Mirëpo po as Endi dhe Kristela nuk do të dinë shumë gjëra, kur Xhesika zhduket.

Çfarë ndodhi? Shumë gjëra, mjaftueshëm tronditëse për të bërë bashkë kundër armiqve të përbashkët dy vajza të cilat orë më parë as nuk njiheshin.  

Pavarësisht peripecive, Tesa nuk “bëri dot asgjë”. Për çfarë “asgjë” e ka fjalën ajo?

Për herë të parë, shfaqet një personazh i ri – Paulini (Dritan Kastrati). Ç’lidhje ka ai me të atin e Endit (Romir Zalla) dhe çfarë kërkon të dijë? I shoqëruar nga miku/ndihmësi i tij, Admiri (Indrit Çobani), Paulini duket një personazh misterioz.

“Po prite mjaftueshëm te lumi, trupat e armiqve i sjell uji vetë,” thotë ai. Cilët janë armiqtë e Paulinit?

Seritë e “$NOB” transmetohen të dielën, ora 20:00 në Top Channel; ritransmetimi të mërkurën, ora 23:30.