Drejtori i Programit Botëror të Ushqimit (PBU) të Kombeve të Bashkuara parashtroi një plan për të shpenzuar 6.6 miliardë dollarë për të luftuar urinë në botë - një përgjigje e drejtpërdrejtë për drejtorin ekzekutiv të Tesla-s, Elon Musk, i cili pretendoi se do të shiste aksionet e Tesla për të financuar një plan nëse PBU mund të përshkruante "saktësisht si" do të funksiononte.
David Beasley postoi të hënën një "përmbledhje ekzekutive" prej 1,000 fjalësh. Përmbledhja përshkruan se si OKB-ja do të shpërndante vakte dhe kupona me vlerë 6.6 miliardë dollarë për të ushqyer më shumë se 40 milionë njerëz në 43 vende që janë "në prag të urisë" - duke shmangur kështu atë që PBU po e konsideron një "katastrofë" të afërt.
Në dokumentin e postuar nga Beasley, PBU propozon të shpenzohen 3.5 miliardë dollarë për të blerë dhe shpërndarë ushqim direkt, 2 miliardë dollarë "për para dhe kupona ushqimore (përfshirë tarifat e transaksionit) në vendet ku mund të funksionojnë tregjet" dhe shpenzimin e 700 milionë dollarëve të tjerë për të menaxhuar programet e reja ushqimore të përshtatura sipas nevojave të vendeve.
400 milionë dollarë të tjera do të përdoren për "menaxhimin e operacioneve, administrimin dhe llogaridhënien" dhe koordinimin e zinxhirit të furnizimit.
"Kjo krizë urie është urgjente, e paprecedentë dhe e shmangshme," shkroi Beasley në një postim të veçantë në Twitter drejtuar Musk, njeriu më i pasur në botë me një pasuri neto prej rreth 288 miliardë dollarë. "Ju kërkuat një plan të qartë me letra të hapura. Ja ku është! Ne jemi gati të flasim me ju - dhe këdo tjetër - që e ka seriozisht për të shpëtuar jetë."
Në fillim të nëntorit, Elon Musk tha se është i gatshëm të dhurojë një pjesë të pasurisë së tij për t’i dhënë fund krizës së urisë në botë, mjafton që Organizata e Kombeve të Bashkuara t’i vërtetojë se si 6 miliardë dollarë do t’i japin fund krizës. Elon Musk sfidoi pretendimin e Beasley-t, cili tha se se vetëm një përqindje e vogël e pasurisë së Musk mund të ndihmonte në zgjidhjen e problemit të urisë në botë.
